អ្នក​វិភាគ​បាល់ទាត់​ម្នាក់​លើក​ឡើង​ថា Liverpool គួរ​តែ​លក់ Salah ហើយ​រក្សា​ទុក Sadio Mane ជំនួស​វិញ

លោក Richard Keys ដែល​ជា​អ្នក​វិភាគ​បាល់ទាត់ម្នាក់​បាន​បញ្ចេញមតិ​ផ្ទាល់​ខ្លួន​​ប្រាប់​ទៅ Liverpool ថា ពួក​គេ​គួរ​តែ​លក់ Mohamed Salah ជំនួស​ឲ្យការ​លក់ Sadio Mane ក្នុង​អំឡុង​ពេល​នៃ​ទីផ្សារ​ដោះដូរ​កីឡាករ​រដូវក្តៅ​ដែល​ទើប​នឹង​បញ្ចប់​ទៅ​ថ្មីៗ​នេះ។

ដោយ​ឡែក​ទម្រង់​លេង​របស់​ក្លឹប​ហង្សក្រហម Liverpool នៅ​រដូវកាល​នេះ ហាក់​ដូច​ជា​មិន​សូវ​ល្អ​ឡើយ ខណៈ​ដែល​បច្ចុប្បន្ន​ពួក​គេ​ឈរ​នៅ​លេខ​រៀង​ទី 8 ក្នុង​​តារាង Premier League ដោយ​មាន​ពិន្ទុ​សរុប 9 ពិន្ទុ។ ហង្ស​ក្រហម​បាន​ស្មើ 3 ប្រកួត ឈ្នះ​ 2 និង​​ចាញ់ 1 ​ក្នុង​ចំណោម 6 ​ប្រកួត​កន្លង​មក។

លើស​ពី​នេះ​ទៅ​ទៀត ក្រុម​របស់​លោក Jurgen Klopp ក៏​បាន​រង​បរាជ័យ​យ៉ាង​អាម៉ាស់ ក្នុង​លទ្ធផល 4-1 ក្រោម​ដៃ​របស់​ក្លឹបមក​ពី​អ៊ីតាលី Napoli ក្នុង​ការ​ប្រកួត​បើកឆាក UEFA Champions League របស់​ពួក​គេ​កាល​ពី​ប៉ុន្មាន​ថ្ងៃ​មុន។

ដោយ​វាយ​តម្លៃ​ពី​ការ​ចាប់ផ្តើម​រដូវកាល​របស់ Liverpool លោក Richard Keys បាន​លើក​ឡើង​ថា គាត់​មាន​ការ​ភ្ញាក់ផ្អើល​ចំពោះ​ទម្រង់​លេង​មិន​ល្អ​របស់​ហង្សក្រហម និង​បាន​បន្ថែម​ថា ប្រហែល​ជា​ពួកគេ​នៅ​មាន​​ភាព​​នឿយ​ហត់​​ខ្លាំង។

លោក Richard Keys ដែល​ជា​អ្នក​ធ្វើ​បទ​បង្ហាញ​របស់ BeIN Sports បាន​សរសេរ​ថា៖ “ខ្ញុំ​មិន​អាច​​ធ្វើ​ពុត​ជាភ្ញាក់ផ្អើល​តិចតួច​ចំពោះ​ការ​ចាប់ផ្តើម​ដ៏​រអាក់រអួល​របស់ Liverpool នោះ​ទេ។ ខ្ញុំ​​ប្រាកដ​​ថា អ្វី​ដែល​ខ្ញុំ​យល់​ឃើញ​គឺ​​ត្រឹម​ត្រូវ ហើយ​​ពួកគេ​មើល​ទៅ​ពិត​ជា​ហត់​នឿយ។ ទម្រង់​លេង​របស់ Salah ​មិន​​ល្អប្រសើរ ហើយ​នោះ​ជា​ការ​បារម្ភ​សម្រាប់ Klopp។ ខ្ញុំ​ដឹង​ថា ពួក​គេ​ត្រូវ​តែ​លក់​ម្នាក់ ក្នុង​ចំណោម Mane រឺ Salah ដោយ​សារ​តែ​កុងត្រា​របស់​គេ​ទាំង​ពីរ​កំពុង​ជិត​ផុត ប៉ុន្តែ​នៅ​ពេល​នេះ វាហាក់​ដូច​ជា​ពួក​គេ​លក់​ខុស ទោះ​បី​ជា​យើង​មើល​ទៅ Mane ដូចជាមិន​សូវ​ល្អ​នៅ Bayern Munich ក៏ដោយ”។

ប្រភព: Dailypost NG