Alvarez និង Rabiot កំពុង​ស្ថិត​នៅ​ក្នុង​រ៉ាដា​របស់ Bayern Munich

ក្លឹប Bayern Munich កំពុង​ពិចារណា​លើ​ការ​ផ្ទេរ​ខ្សែប្រយុទ្ធ​សញ្ជាតិ​អាហ្សង់ទីន Julian Alvarez និង​ខ្សែបម្រើ​សញ្ជាតិ​បារាំង Adrien Rabiot នៅ​រដូវក្តៅ​នេះ (នេះ​បើ​យោងតាម​ការ​ចុះផ្សាយ​ពី​សារព័ត៌មាន BILD របស់​អាឡឺម៉ង់)។ រដូវកាល​នេះ​មិន​មែន​ជា​រដូវកាល​ដ៏​ល្អ​របស់ Bayern Munich ឡើយ ហើយ​កាល​​ពី​ខែ​មុន ពួក​គេ​ត្រូវ​បាន​ធ្លាក់​ចេញ​ពី UEFA Champions League ទៀត​ផង។

លើស​ពី​នេះ​ទៅ​ទៀត Bayern Munich ទំនង​ជា​នឹង​ខកខាន​ការ​ឈ្នះ​ពាន Bundesliga នៅ​រដូវកាល​នេះ​ផង​ដែរ ដោយ​បច្ចុប្បន្ន​ពួក​គេ​ឈរ​ក្នុង​ចំណាត់​ថ្នាក់​លេខ 2 ដែល​មាន​ពិន្ទុ​ចាញ់​ក្រុម​លេខ 1 Borussia Dortmund ចំនួន 2 ពិន្ទុ និង​នៅ​សល់​ប្រកួត​ចុង​ក្រោយ​មួយ​នៅ​ក្នុង​ដៃ​ដូច​គ្នា។

មិន​ថា​ពួក​គេ​ឈ្នះ​ពាន​លីក រឺ​អត់​នោះ​ទេ ការ​កែ​លម្អ​ក្រុម​នឹង​ត្រូវ​ធ្វើ​ឡើង​នៅ​ចុង​បញ្ចប់​នៃ​រដូវកាល​នេះ ហើយ​របាយការណ៍​ចុង​ក្រោយ​មួយ​បាន​អះអាង​ថា ពួក​គេ​កំពុង​សម្លឹង​មើល​កិច្ច​ព្រមព្រៀង​ដែល​អាច​ទៅ​រួច​ជាមួយ Alvarez និង Rabiot។ យ៉ាង​ណា​មិញ​ខ្សែ​ប្រយុទ្ធ​ដែល​ឈ្នះ World Cup ជាមួយ​អាហ្សង់ទីន Julian Alvarez បច្ចុប្បន្ន​មិន​មែន​ជា​ជម្រើស​ដំបូង​របស់​ក្លឹប Man City ឡើយ ប៉ុន្តែ​គាត់​រក​បាន​គ្រាប់​បាល់​រហូត​ដល់ 17 គ្រាប់ ក្នុង​ការ​បង្ហាញ​ខ្លួន​ត្រឹមតែ 22 ប្រកួត​ប៉ុណ្ណោះ។

សម្រាប់​ខ្សែ​បម្រើ Adrien Rabiot វិញ គឺ​កំពុង​ត្រៀម​នឹង​ចាកចេញ​ពី Juventus នៅ​ចុង​បញ្ចប់​នៃ​រដូវកាល​នេះ​ហើយ ដោយ​កុងត្រា​របស់​គាត់​ផុត​កំណត់។ កីឡាករ​សញ្ជាតិ​បារាំង​រូប​នេះ​បាន​បដិសេធ​សំណើរ​បន្ត​កុងត្រា​ថ្មី​ពី Juventus។ ជា​មួយ​នឹង​ទេពកោសល្យ​ដ៏​អស្ចារ្យ និង​មិន​ចាំ​បាច់​ចាយ​លុយ​លើ​ការ​ផ្ទេរ Adrien Rabiot ត្រូវ​បាន​ក្លឹប​ជា​ច្រើន​ចង់​បាន ហើយ​ជា​ពិសេស​នោះ​គឺ Bayern Munich។

ប្រភព: Footballtoday