Allan Saint-Maximin កំពុង​ស្វែងរក​ក្លឹប​ថ្មី ខណៈ​ដែល​ការ​ផ្ទេរ​ទៅ​អារ៉ាប៊ីសាអូឌីត​ជា​ជម្រើស​មួយ​ក្នុង​ដៃ

កីឡាករ​សញ្ជាតិ​បារាំង​ដែល​មាន​ប្រាក់​បៀវត្សរ៍ 4.5 លានអឺរ៉ូ កំពុង​ព្យាយាម​ចង់​ស្វែងរក​ទ្រនំ​ថ្មី​នៅ Serie A ប្រសិន​បើ​គាត់​ចាកចេញ​ពី Newcastle ក្នុង​រដូវកាល​នេះ។ ជា​ការ​ពិតណាស់ អារ៉ាប៊ីសាអូឌីត ក៏​ត្រូវ​បាន​គេ​ដឹង​ថា ជាជម្រើស​មួយ​សម្រាប់​ខ្សែ​ប្រយុទ្ធ​ឆ្នើម​រូប​នេះ​ដែរ បើ​ទោះ​បី​ជា​គាត់​មិន​ទាន់​សម្រេច​ចិត​ចង់​ទៅ​លេង​នៅ​ទីនោះ​ក៏​ដោយ។

តារា​ឆ្នើម​ដែល​ពូកែ​ញាក់​បាល់ Allan Saint-Maximin ត្រូវ​បាន​គេ​ដឹង​ថា កំពុង​តាម​ដាន​ដោយ​ក្លឹប​នៅ Premier League ចំនួន​ពីរ​គឺ Everton និង Crystal Palace។ ទន្ទឹម​នឹង​នេះ​ដែរ AC Milan ដែល​ជា​ក្លឹប​នៅ​អ៊ីតាលី និង​ក្លឹប​យក្ស​របស់​បារាំង Marseille ក៏​ត្រូវ​បាន​គេ​ដឹង​ថា ចាប់​អារម្មណ៍​សម្រាប់​ការ​ផ្ទេរ​កីឡាករ​វ័យ 26 ឆ្នាំ​រូប​នេះ​ដែរ។

យ៉ាង​ណា​មិញ ប្រសិន​បើ Allan Saint-Maximin សម្រេច​ចិត្ត​លើ​អនាគត​របស់​ខ្លួន ដោយ​នៅ​តែ​ចង់​ចាកចេញ​ពី​ក្លឹប​បច្ចុប្បន្ន ហើយ​គាត់​មិន​អាច​ស្វែងរក​ក្លឹប​ថ្មី​នៅ​លីគ​កំពូល​ទាំង 5 របស់​អឺរ៉ុប​បាន នោះ​គាត់​នឹង​សល់​ជម្រើស​ពិសេស​មួយ​នៅ​ក្នុង​ដៃ ដោយ​ផ្ទេរ​ទៅ​អារ៉ាប៊ីសាអូឌីត ខណៈ​ដែល​មាន​ក្លឹប​ជា​ច្រើន​នៅ Saudi Pro League ចង់​បាន​គាត់​ដូច​ជា៖ Al Nassr, Al Hilal, Al Ittihad និង Al Ahli។

ប្រភព: 90 Min