Tottenham Hotspur កំពុង​បញ្ចុះបញ្ចូល Kane ឲ្យ​បន្ត​កុងត្រា​ថ្មី ដែល​មាន​ប្រាក់​ពលកម្ម​ដ៏​ច្រើន​លើស​លុប

ខ្សែប្រយុទ្ធ Harry Kane របស់​ក្លឹប​មាន់ខ្នាយមាស Tottenham Hotspur ត្រូវ​បាន​គេ​រាយការណ៍​មក​ថា អាច​នឹង​បន្ត​កុងត្រា​នៅ​ក្លឹប​បច្ចុប្បន្ន​របស់​ខ្លួន​បន្ត​ទៀត ខណៈ​ដែល​ពេល​នេះ ទឹកប្រាក់​ប្រមាណ​ជា 400,000 ផោន ក្នុង​មួយ​សប្តាហ៍ កំពុង​ត្រូវ​បាន​រៀប​ចំ​ឡើង​ដើម្បី​ទាក់ទាញ​ចិត្ត​ខ្សែ​ប្រយុទ្ធ​សញ្ជាតិ​អង់គ្លេស​រូប​នេះ។

យ៉ាង​ណា​មិញ កាពីតែន​ក្រុម និង​ជា​ខ្សែ​ប្រយុទ្ធ​ឆ្នើម Harry Kane នឹង​ដើរ​ចេញ​ពី Tottenham Hotspur ដោយ​គ្មាន​តម្លៃ​ខ្លួន​នៅ​ចុង​បញ្ចប់​នៃ​រដូវកាល 2023-2024 ពេល​ដែល​កុងត្រា​របស់​គាត់​ផុត​កំណត់។ ទោះបី​ជា​ជោគជ័យ​ផ្ទាល់​ខ្លួន និង​ត្រូវបាន​គេ​ចាត់ទុក​ជា​កីឡាករ​ល្អ​បំផុត​ក៏​ដោយ កីឡាករ​វ័យ 29 ឆ្នាំ​រូបនេះ​មិន​ទាន់​ឈ្នះ​ពានរង្វាន់​អ្វី​ជា​ដុំ​កំភួន ជាមួយ​នឹង Tottenham Hotspur នៅ​ឡើយ​ទេ ក្រោយ​ឆ្នាំ 2007-2008 ឈ្នះមេដាយ​ប្រាក់ EFL Cup។

អនាគត​របស់ Harry Kane ត្រូវ​បាន​គេ​ចាប់​ផ្ដើម​ជជែក​វែក​ញែក​ជា​ថ្មី​ម្ដង​ទៀត​បន្ទាប់​ពី​ក្លឹប Bayern Munich, Paris Saint-Germain និង Manchester United កំពុង​តាមដាន​យ៉ាង​ជិតដិត​ដើម្បី​ផ្ទេរ​គាត់​ចេញ​ពី​ក្លឹប​បច្ចុប្បន្ន​របស់​ខ្លួន។ ផ្ទុយ​មក​វិញ ថ្មីៗ​នេះ​ប្រធាន​ក្លឹប​មាន់ខ្នាយមាស​លោក Daniel Levy បាន​និយាយ​ដោយ​ជំហរ​ច្បាស់លាស់​ថា Harry Kane នៅ​តែ​ជា​កីឡាករ​របស់​ពួក​គេ និង​មិន​មែន​សម្រាប់​លក់​នៅ​រដូវក្តៅ​នេះ​ឡើយ។

ជា​លទ្ធផល Daniel Levy កំពុង​ធ្វើការ​បញ្ចុះបញ្ចូល Kane ដើម្បី​ឲ្យ​គាត់​ស្នាក់​នៅ Tottenham Hotspur បន្ត​ទៀត ស្រប​ពេល​ដែល​របាយការណ៍​ពី The Telegraph បាន​ចុះ​ផ្សាយ​ថា ក្លឹប​មាន់ខ្នាយ​មាស នឹង​ដាក់​លុយ​ធំ ដែល​មាន​តម្លៃ 400,000 ផោន​ក្នុង​មួយសប្តាហ៍​សម្រាប់​​តម្លើង​ប្រាក់​ពលកម្ម​ដល់​កីឡាករ​វ័យ 29 ឆ្នាំ Harry Kane ប្រសិន​បើ​គាត់​បន្ត​កុងត្រា​ថ្មី​ជា​ច្រើន​ឆ្នាំ​ទៀត​ជាមួយ​ពួក​គេ។

ប្រភព: Sportsmole