ការ​របូត​គ្រាប់​បាល់​ដ៏​ច្រើន​បំផុត ក្នុង​ប្រវត្តិសាស្ត្រ​របស់​ក្លឹប Real Madrid

ក្លឹប Real Madrid គឺ​ជា​ក្លឹប​ដែល​ជោគជ័យ​បំផុត​ក្នុង​ប្រវត្តិសាស្ត្រ​បាល់ទាត់ ប៉ុន្តែ​នេះ​មិនមែន​មាន​ន័យ​ថា ក្លឹបយក្ស​របស់​អេស្ប៉ាញ​មួយ​នេះ​មិន​ធ្លាប់​ត្រូវ​បាន​ចាញ់​ដ៏​ធ្ងន់​ធ្ងរ​ក្រោម​ស្នា​ដៃ​របស់​ក្លឹប​ផ្សេង​ទៀត​ឡើយ ហើយ​ការ​ក្រឡេក​មក​មើល​ប្រវត្តិសាស្ត្រ​ពី​អតីតកាល​របស់​ពួក​គេ​ក៏​ជា​រឿង​ដែល​យើង​គួរ​ដឹង​ផង​ដែរ។ តើ Real Madrid ធ្លាប់​របូត​គ្រាប់​បាល់​ដ៏​ច្រើន​បំផុត​ចំនួន​ប៉ុន្មាន​គ្រាប់ និង​នៅ​ពេល​ណា​ខ្លះ?

ការ​បរាជ័យ​ដ៏​ធំ​បំផុត​មិន​ធ្លាប់​មាន​ក្នុង​ប្រវត្តិសាស្ត្រ​របស់​ក្លឹប Real Madrid បាន​កើត​ឡើង​នៅថ្ងៃ​ទី 5 ខែ​មីនា ឆ្នាំ 1930 ដែល​ជា​ការ​ប្រកួត​ក្របខណ្ឌ La Liga ដោយ Espanyol ជា​ក្លឹប​មក​ពី​តំបន់​កាតាឡាន់ បាន​លុត​ពួក​គេ​ជាមួយ​លទ្ធផល 8-1។ នៅ​ឆ្នាំ​បន្ទាប់​មក​ដល់​ថ្ងៃទី 18 ខែមករា ឆ្នាំ 1931 ជា​ការ​ប្រកួត La Liga ដដែល​នោះ Real Madrid បាន​ចាញ់ 6-0 ក្រោម​ស្នាដៃ​របស់ Athletic Bilbao ហើយ​នេះ​ជា​ការ​បរាជ័យ​ដ៏​ធំ​ក្នុង​ទឹកដី​របស់​ខ្លួន​ឯង​លើក​ដំបូង។

ដោយ​ឡែក​សម្រាប់​ការបរាជ័យ​ខ្លាំង​បំផុត​ក្នុង​ប្រវត្តិសាស្ត្រ​នៃ​ការ​ប្រកួត​ពាន​នៅ​តំបន់​អឺរ៉ុប Real Madrid បាន​ចាញ់ 5-0 ក្រោម​ស្នាដៃ AC Milan ជា​ការ​ប្រកួត European Cup វគ្គពាក់​កណ្តាល​ផ្តាច់ព្រ័ត្រ​ជើង​ទីពីរ​នៅ​ថ្ងៃទី 19 ខែ​មេសាឆ្នាំ 1989។ គ្រាប់​បាល់​សរុប​ការ​ប្រកួត​ទាំងពីរ​ជើង​នៅ​ពេល​នោះ​គឺ 6-1។

បន្ត​មក​ទៀត​នៅ​ថ្ងៃទី 10 ខែ​មីនា ឆ្នាំ 2009 ដែល​ជា​ការ​ប្រកួត UEFA Champions League ក្លឹប​ហង្សក្រហម​របស់​លោក Rafa Benitez បាន​លុត Real Madrid 4-0 នៅ​ក្នុង​ដី Anfield។ កីឡាករ​ដែល​ស៊ុតបញ្ចូលទី​ពេល​នោះ​គឺ Fernando Torres, Andrea Dossena និង Steven Gerrard (2 គ្រាប់​ម្នាក់​ឯង)។

ប្រភព: Ffootballtransfers