បាល់ទាត់អន្តរជាតិ
Sanchez ថា ខ្លួននឹងដណ្ដើមតំណែងជាអ្នកចាំទីដៃទីមួយរបស់ Chelsea ពី Kepa Arrizabalaga
កីឡាករចំណូលថ្មីរបស់ក្លឹបតោខៀវ Chelsea គឺ Robert Sanchez បានប្តេជ្ញាចិត្តថា ខ្លួននឹងប្រកួតប្រជែងដណ្ដើមតំណែងជាអ្នកចាំទីដៃទីមួយរបស់ក្លឹបពីអ្នកចាំទីបច្ចុប្បន្ន Kepa Arrizabalaga។ យ៉ាងណាមិញ Robert Sanchez បានលើកឡើងបែបនេះ បន្ទាប់ពីចូលរួមផ្លូវការណ៍ជាមួយតោខៀវ កាលពីថ្ងៃសៅរ៍ម្សិលមិញ។
តោខៀវ Chelsea បានចុះហត្ថលេខាលើអ្នកចាំទីសញ្ជាតិអេស្ប៉ាញរូបនេះ ពីក្លឹប Brighton ដើម្បីការប្រកួតប្រជែងតំណែងលេងជាមួយ Kepa Arrizabalag។ ថ្លែងទៅកាន់គេហទំព័រផ្លូវការរបស់ក្លឹបថ្មី Sanchez បានបង្ហើបថា គាត់ចង់ប្រកួតប្រជែង តំណែងជាអ្នកចាំទីជម្រើសដំបូងរបស់ក្លឹបចាប់ពីរដូវកាលថ្មីនេះតទៅ។
Robert Sanchez បានលើកឡើងថា៖ “ខ្ញុំចង់រួមចំណែក និងជួយក្លឹបឲ្យឈ្នះពាន។ ខ្ញុំដឹងថា វានឹងក្លាយជាបញ្ហាប្រឈមដ៏ធំ ប៉ុន្តែខ្ញុំបានត្រៀមខ្លួនរួចជាស្រេចសម្រាប់ការជម្នះវា។ ឱកាសដែលក្លឹប Chelsea ផ្តល់ឲ្យខ្ញុំគឺអស្ចារ្យណាស់ ដើម្បីអភិវឌ្ឍន៍ខ្លួនបន្ថែមទៀត ក្នុងនាមជាអ្នកចាំទី និងបន្តការរៀនសូត្រ ក៏ដូចជាប្រជែងដណ្តើមយកជម្រើសដៃទីមួយ និងបង្ហាញអ្នកទាំងអស់គ្នាថា តើខ្ញុំអាចល្អបានប៉ុណ្ណា”។
ប្រភព: Dailypost NG