បាល់ទាត់អន្តរជាតិ
ទោះទម្រង់លេងល្អក៏ដោយ Real Madrid នៅតែមិនចង់ទិញផ្ដាច់កុងត្រារបស់ Kepa ពីតោខៀវដែរ!!!
ក្លឹបអធិរាជស Real Madrid ត្រូវបានគេរាយការណ៍ថា ពួកគេនឹងមិនចំណាយប្រាក់លើសពី 17.5 លានផោន ដើម្បីចុះហត្ថលេខាលើអ្នកចាំទី Kepa Arrizabalaga របស់ Chelsea នោះឡើយ។ អ្នកចាំទីសញ្ជាតិអេស្ប៉ាញរូបនេះ បានមកដល់ Real Madrid ក្នុងនាមជាអ្នកជំនួសតំណែងរបស់ Thibaut Courtois។
កាលពីខែសីហាកន្លងទៅ Thibaut Courtois បានរងរបួសជង្គង់ធ្ងន់ធ្ងរ ដែលនាំឲ្យ Real Madrid ត្រូវស្វែងរកអ្នកជំនួសគាត់ ហើយចុងក្រោយពួកគេក៏បានសម្រេចចិត្ត ខ្ចីជើងអ្នកចាំទីរបស់ក្លឹបតោខៀវ Chelsea គឺកីឡាករ Kepa Arrizabalaga រយៈពេលពេញមួយរដូវកាល 2023-2024។
Kepa Arrizabalaga បានបង្ហាញទម្រង់លេងដ៏ល្អជាមួយ Real Madrid។ កីឡាករវ័យ 29 ឆ្នាំរូបនេះ បានបង្ហាញខ្លួនសរុបចំនួន 12 ដង ទាំងនៅ La Liga និង UEFA Champions League។ លើសពីនេះទៀត Arrizabalaga បានសារភាពថា គាត់ចង់ចុះហត្ថលេខាជាកីឡាករផ្ដាច់កុងត្រា ដើម្បីមកចូលរួមជាកីឡាករពេញសិទ្ធិរបស់ Real Madrid នៅចុងបញ្ចប់នៃរដូវកាលនេះ។
ផ្ទុយមកវិញ យោងតាមកាសែត The Sun បានឲ្យដឹងថា Real Madrid បានសម្រេចចិត្តរួចហើយថា ពួកគេនឹងមិនចំណាយប្រាក់លើសពី 17.5 លានផោន ដើម្បីចុះហត្ថលេខាទិញផ្ដាច់កុងត្រារបស់ Arrizabalaga ឡើយ។ អ្នកចាំទីរូបនេះ នៅមានកុងត្រានៅ Chelsea រហូតដល់ 2025 ប៉ុន្តែបើតម្លៃខ្លួនរបស់គាត់នៅតែខ្ពស់នោះ Real Madrid នឹងសុខចិត្តឲ្យគាត់ត្រឡប់ទៅទឹកដីអង់គ្លេសវិញ ពេលលក្ខខណ្ឌនៃការខ្ចីជើងផុតកំណត់។
ប្រភព: Sportsmole