Arsenal ត្រៀម​ចាយលុយ 60 លានផោន លើ​ខ្សែ​ប្រយុទ្ធ​ឆ្នើម​មួយ​រូប​របស់ Crystal Palace

ក្លឹប​កាំភ្លើងធំ Arsenal ត្រូវ​បាន​គេ​រាយការណ៍​ថា កំពុង​មាន​ភាគរយ​កាន់​តែ​ខ្ពស់ ក្នុង​ការ​ប្រជែង​ដើម្បី​ចុះ​ហត្ថលេខា​លើ​ខ្សែ​ប្រយុទ្ធ​ស្លាប​របស់​ក្លឹប Crystal Palace គឺ​កីឡាករ Michael Olise។ កីឡាករ​សញ្ជាតិ​បារាំង​រូបនេះ បាន​ជួប​បញ្ហា​របួស​សរសៃពួរ​ក្នុង​រដូវកាល​ឆ្នាំ 2023-2024 កន្លង​ទៅ ដែល​ធ្វើ​ឲ្យ​គាត់​បង្ហាញ​ខ្លួន​បាន​ត្រឹមតែ 19 ប្រកួត​ប៉ុណ្ណោះ​នៅ Premier League។

ទោះបី​ជា​ត្រូវ​បាន​រារាំង​ដោយ​របួស​ក៏ដោយ Michael Olise នៅ​តែ​អាច​បង្ហាញ​ពី​គុណភាព​លេង​ដ៏​ល្អ​បំផុត​ដោយ​រក​បាន​គ្រាប់​បាល់ 10 គ្រាប់ ហើយ​ត្រូវ​បាន​ឈរ​ក្នុង​តំណែង​ជា​អ្នក​ស៊ុតបញ្ចូលទី​ច្រើន​ជាង​គេ​ទី 3 របស់ Crystal Palace ផង​ដែរ ដោយ​តាម​ពី​ក្រោយ Eberechi Eze និង Jean-Philippe Mateta។

យ៉ាង​ណា​មិញ មជ្ឈដ្ឋាន​បាល់ទាត់​បាន​មើល​ឃើញ​ថា Crystal Palace មិន​មែន​ជា​ទ្រនំ​ដ៏​យូរ​អង្វែងរ​បស់ ខ្សែ​បម្រើ​ប្រយុទ្ធ​វ័យ 22 ឆ្នាំ​រូប​នេះ​ឡើយ ខណៈ​ដែល​មាន​ក្លឹប​កំពូលៗ​មួយ​ចំនួន​ធំ​នៅ Premier League កំពុង​សម្លឹង​មើល​ចង់​ចុះ​ហត្ថលេខា​លើ​គេ។ យោងតាម​ការ​ចុះផ្សាយ​របស់ The Mirror បាន​ឲ្យ​ដឹង​ថា ក្លឹប​កាំភ្លើងធំ​កំពុង​មាន​ភាគរយ​ខ្ពស់​ជាង​គេ​ក្នុង​ចំណោម​ក្លឹប​ផ្សេង​ទៀត​ដែល​ចង់​ចុះហត្ថលេខា​លើ Michael Olise។

Michael Olise ត្រូវ​បាន​គេ​រាយការណ៍​ថា មាន​តម្លៃ​ខ្លួន​នៃ​ការ​លក់​ចេញ​ប្រហែល 60 លានផោន ខណៈ​ដែល​កុងត្រា​របស់​គាត់​ជាមួយ​ក្លឹប Crystal Palace មាន​សុពកភាព​ដល់​ឆ្នាំ 2027។

ប្រភព: Sportsmole