តើ​ដៃ​គូ​ប្រយុទ្ធ​ពីរ​រូប​ណា ដែល​លេង​យល់​ចិត្ត​គ្នា​បាន​ល្អ​បំផុត​នៅ​ក្នុង​ពិភព​បាល់ទាត់?

បាល់ទាត់ គឺ​កីឡា​មួយ​បែប​ដែល​មាន​ការ​ប្រកួត​ជា​ក្រុម។ ប៉ុន្តែ​នៅ​ក្នុង​នោះ ក៏​មាន​ការ​ចែក​តំបន់​លេង ជា​ផ្នែក​ផ្សេងៗ​តូចៗ​ទៀត​ដែរ​ដូច​ជា តំបន់​ការពារ, តំបន់​បម្រើ និង​តំបន់​ប្រយុទ្ធ។ មុន​នឹង​ក្រុម​មួយ​អាច​លេង​បាន​ល្អ ផ្នែក​នីមួយៗ​ដែលមាន ការពារ​ក្រោម បម្រើ និង​ប្រ​យុទ្ធ​ត្រូវ​លេង​ឲ្យ​បាន​ល្អ​សិន បន្ត​មក​ទៀត​ផ្នែកទាំង​បី​នេះ ត្រូវ​សហការ​គ្នា​ជា​ធ្លុងមួយ ដើម្បី​បង្កើន​ប្រសិទ្ធិភាព និង​ឱកាស​ទៅ​លើ​គូប្រកួត។

ប៉ុន្តែ​វា​ជា​រឿង​ដ៏​កម្រ​ផង​ដែរ ដែល​នៅ​ក្នុង​ក្រុម​មួយ អាច​មាន​គុណភាព​នៃ​ការ​លេង​បាន​ល្អ​ទាំង​បី​តំបន់។ ក្រុម​ខ្លះ​ល្អ​នៅ​តំបន់​បម្រើ និង​ប្រយុទ្ធ តែ​ស្ទើរ​នៅ​ផ្នែក​ការពារ​ក្រោម។ ជា​ឧទាហរណ៍​ជាក់​ស្ដែង ដូច​កាល​ពី​មុន​ពេល​លោក Xavier Hernandez មក​ដឹកនាំ Barcelona ក្លឹប​យក្ស​កាតាឡាន់​មួយ​នេះ ពិត​ជា​ធ្លាក់​ទម្រង់​លេង​យ៉ាង​ខ្លាំង ព្រោះ​ពួក​គេ​លេង​បាន​ល្អ​តែ​នៅ​តំបន់​បម្រើ​ប៉ុណ្ណោះ ហើយ​ខ្សោយ​ប្រយុទ្ធ និង​ការពារ ជា​ពិសេស​ការពារ​ស្លាប​ទាំង​សងខាង។

តំបន់​នីមួយៗ​នោះ កីឡាករ​ដែល​លេង​ជាមួយ​គ្នា​ត្រូវ​តែ​យល់​ចិត្ត​គ្នា និង​ជា​មនុស្ស​ដែល​ចុះ​សម្រុង​គ្នា​ផង​ដែរ ប្រសិន​បើ​ពួក​គេ​ជា​មិត្ត​ល្អ​នឹង​គ្នា​ទៀត​កាន់​តែ​ប្រសើរ។ យ៉ាង​ណា​មិញ ថ្ងៃ​នេះ​យើង​នឹង​បង្ហាញ​ជូន​អ្នក​ទាំងអស់​គ្នា​នូវ​កីឡាករ​ដែល​ជា​ដៃ​គូ​លេង​នៅ​តំបន់​ប្រយុទ្ធ​បាន​ល្អ​បំផុត​ក្នុង​ប្រវត្តិសាស្ត្រ​បាល់ទាត់។

5. Arjen Robben និង Frank Ribery (ពេល​លេង​ឲ្យ Bayern Munich)

អតីត​ខ្សែ​ប្រយុទ្ធ​ឆ្នើម Arjen Robben និង Frank Ribery ត្រូវ​បាន​គេ​ចាត់​ទុក​ថា ជា​ដៃ​គូ​ដែល​លេង​នៅ​តំបន់​ប្រយុទ្ធ​ដ៏​ល្អ​បំផុត​។ អ្នក​ទាំង​ពីរ​​លេង​បាន 187 ប្រកួត​ជាមួយ​គ្នា​នៅ​ចន្លោះឆ្នាំ 2009 និង 2019 ដោយ​សរុប​គ្រាប់​បាល់​បាន 37 គ្រាប់ ខណៈ​ដែល 28 ជា​ការ Assist ដោយ Ribery និង 9 គ្រាប់​ដោយ Arjen Robben។

4. Harry Kane និង Heung-min Son (លេង​ឲ្យ Tottenham Hotspur)

Kane ធ្លាប់​បាន​និយាយ​ថា គាត់​ចំណាយ​ពេល​វេលា​ជា​មួយ Heung-min Son ច្រើន​ជាង​ភរិយា​របស់​គាត់។ នេះ​បង្ហាញ​ឲ្យ​ឃើញ​ពី​ភាព​ជិតស្និទ្ធិ​បំផុត​របស់​ខ្សែ​ប្រយុទ្ធ​ទាំង​ពីរ​រូប​នេះ។ គេ​ជា​ដៃ​គូ​លេង​ជា​មួយ​គ្នា​ដ៏​ល្អ​បំផុត។ ចាប់​តាំង​ពី​ក្លាយ​ជា​មិត្ត​រួម​ក្រុម​នឹង​គ្នា​ក្នុង​ឆ្នាំ 2015 ខ្សែ​ប្រយុទ្ធ Heung-min Son និង Kane បាន​បង្ហាញ​ខ្លួន​ក្នុង​ការ​ប្រកួត​ចំនួន 251 ប្រកួត ជាមួយគ្នា ដោយ​ស៊ុត​បញ្ចូល​ទី​បាន 53 គ្រាប់។

3. Frank Lampard និង Didier Drogba (ពេល​លេង​ឲ្យ Chelsea)

Frank Lampard និង Didier Drogba គឺ​ជា​ដៃ​គូ​លេង​ដ៏​ល្អ​បំផុត​របស់​ក្លឹប​តោខៀវ Chelsea។ អ្នក​ទាំង​ពីរ​បាន​ឈ្នះ​ពាន Premier Leagues ចំនួន​បី និង UEFA Champions League មួយ ជាមួយ​គ្នា ហើយ​ពេល​នោះ​ក្លឹប​តោខៀវ Chelsea កំពុង​មាន​ភាព​លេច​ធ្លោរ​ខ្លាំង​បំផុត​នៅ​អង់គ្លេស។ គ្រាប់​បាល់​របស់​អ្នក​ទាំង​ពីរ​រួមបញ្ចូល​គ្នា​មាន 58 គ្រាប់ ក្នុង​ការ​បង្ហាញ​ខ្លួន 300 ប្រកួត។

2. Cristiano Ronaldo និង Karim Benzema (ពេល​លេង​ឲ្យ Real Madrid)

Ronaldo និង Karim Benzema មិន​ត្រឹម​តែ​ជា​ដៃ​គូ​ល្អ​នៅ​លើ​ទីលាន​ប៉ុណ្ណោះ​ទេ អ្នក​ទាំងពីរ​ក៏​ជា​មិត្ត​ល្អ​នឹង​គ្នា​ផង​ដែរ។ ពួក​គេ​លេង​ជាមួយ​គ្នា​នៅ Real Madrid ចន្លោះ​ឆ្នាំ 2009 និង 2018 ដោយ​សរុប​គ្រាប់​បាល់​ចូល​គ្នា​បាន 76 គ្រាប់ ក្នុង​ការ​បង្ហាញ​ខ្លួន 342 ប្រកួត។ Benzema បញ្ជូន​បាល់​ឲ្យ Ronaldo ស៊ុត​បាន 47 ដង ខណៈ​ដែល Ronaldo បញ្ជូន​បាល់​ឲ្យ Benzema បាន 29 ដង។

1. Lionel Messi និង Luis Suarez (ពេល​លេង​ឲ្យ Barcelona)

Messi និង Luis Suarez គឺ​ជា​ដៃ​គូ​ដែល​លេង​យល់​ចិត្ត​គ្នា​បំផុត។ គាត់​ជា​មិត្ត​ល្អ​នឹង​គ្នា​នៅ​ក្រៅ​ទីលាន ហើយ​តែងតែ​មាន​ពេល​វិស្សមកាល​ដើរ​លេង​ជា​មួយ​គ្នា​ជា​ញឹកញាប់​ផង​ដែរ តាំង​ពី​លេង​ជា​មួយ​គ្នា​នៅ Barcelona ហើយ​មក​ដល់​បច្ចុប្បន្ន​ក៏​ដោយ។ Luis Suarez និង Lionel Messi លេង​បាន 258 ប្រកួត​ជាមួយ​គ្នា និង​សរុប​គ្រាប់​បាល់​បាន​រហូត​ដល់ 99 គ្រាប់។

ប្រភព: Sportskeeda