Joao Cancelo ត្រៀម​ផ្ទេរ​ទៅ​ចូលរួម​ជា​មួយ Bayern Munich

ខ្សែ​ការពារ Joao Cancelo របស់​ក្លឹប​មេឃខៀវ Manchester City ត្រូវ​បាន​គេ​រាយការណ៍​ថា នឹង​ផ្ទេរ​ទៅ​ចូលរួម​ជាមួយ​ក្លឹប Bayern Munich ក្នុង​លក្ខខណ្ឌ​ខ្ចី​ជើង​រហូត​ដល់​ចុង​បញ្ចប់​នៃ​រដូវកាល​នេះ។ យ៉ាង​ណា​មិញ​កីឡាករ​សញ្ជាតិ​ព័រទុយហ្គាល់​រូប​នេះ ហាក់​ដូច​ជា​មិន​ស្ថិត​ក្នុង​ចំណូល​ចិត្ត​របស់​លោក Pep Guardiola ទៀត​ឡើយ នៅ​ប៉ុន្មាន​ប្រកួត​ចុងក្រោយ​នេះ។

នៅ​តំបន់​ការពារ​ដែល Joao Cancelo ធ្លាប់​លេង ត្រូវ​បាន​ជំនួស​មក​វិញ​ដោយ​កីឡាករ Rico Lewis ដែល​មាន​វ័យ 18 ឆ្នាំ។ ដូចគ្នា​នេះ​ដែរ John Stones, Kyle Walker, Aymeric Laporte និង Nathan Ake ក៏​ត្រូវ​បាន​ប្រើប្រាស់​ក្នុង​តួនាទី​ការពារ​មុន​ជម្រើស Joao Cancelo ផង​ដែរ ក្នុង​ការ​ប្រកួត 3 លើក​ចុងក្រោយ​របស់ Manchester City។

យោងតាម​របាយការណ៍​ច្បាស់ការណ៍​មួយ​ពី​លោក Fabrizio Romano បាន​អះអាង​ថា Bayern Munich បាន​សម្រេច​ចិត្ត​ដ៏​គួរ​ឲ្យ​ភ្ញាក់​ផ្អើល​មួយ​ដោយ​ធ្វើ​ការ​ផ្ទេរ Joao Cancelo ខណៈ​ដែល​ខ្សែ​ការពារ​ស្ដាំ Mazraoui របស់​ខ្លួន​កំពុង​រងរបួស ហើយ Pavard អាច​នឹង​ចាកចេញ​នៅ​រដូវក្តៅ​នេះ​ទៅ Barcelona។ ក្លឹប Bayern Munich បាន​កំណត់​កាល​វេលា​ធ្វើ​តេស្ត​សុខភាព​រួច​ហើយ ប្រសិន​បើ​អ្វីៗទាំង​អស់​ដំណើរការ​ដោយ​រលូន នោះ​ពួក​គេ​នឹង​ប្រកាស​ពី​ការ​ចូលរួម​របស់ Joao Cancelo ក្នុង​ពេល​ឆាប់ៗ​នេះ។

ប្រភព: Sportsmole