Real Madrid ត្រៀម​ចុះ​ហត្ថលេខា​នាំ​យក​អតីត​កីឡាករ​របស់​ខ្លួន Fran Garcia ត្រឡប់​មក​វិញ

ក្លឹប​អធិរាជ​ស Real Madrid ត្រូវ​បាន​គេ​រាយការណ៍​ថា ជិត​បញ្ចប់​កិច្ច​ព្រម​ព្រៀង​មួយ​សម្រាប់​ការ​ផ្ទេរ​នាំ​យក Fran Garcia មក Bernabeu វិញ​ហើយ ដោយ​​កីឡាករ​សញ្ជាតិ​អេស្ប៉ាញ​រូប​នេះ​បាន​ចាកចេញ និង​​ចូល​រួម​ជា​មួយ​ក្លឹប Rayo Vallecano តាំង​ពី​ឆ្នាំ 2021 មក​ម្ល៉េះ។

ខ្សែការពារ​ឆ្វេង​ដែល​មាន​វ័យ 23 ឆ្នាំ​រូបនេះ​គឺ​ជា​កីឡាករ​ដែល​ប្រសូត្រ​ចេញ​ពី​ថ្នាល​យុវជន​របស់​ក្លឹប Real Madrid ប៉ុន្តែ​គាត់​បាន​លេង​ភាគ​ច្រើន​នៅ​ឈុត B តែ​ប៉ុណ្ណោះ។ នៅ​ចន្លោះ​ឆ្នាំ 2018 និង 2020 គាត់​ត្រូវ​បាន​ប្រូម៉ូត​ឡើង​មក​លេង​ជាមួយ​ឈុត​ធំ តែ​មិន​មាន​ឱកាស​បង្ហាញ​ខ្លួន​សូម្បី​​មួយ​ប្រកួត។

បន្ត​មក​ទៀត ក្នុង​កំឡុង​យុទ្ធនា​ការ​រដូវកាល​ឆ្នាំ 2020-2021 ក្លឹប Rayo Vallecano ចុះ​ហត្ថលេខាខ្ចី​ជើង Fran Garcia ហើយ​នៅ​ឆ្នាំ​បន្ទាប់​ពួក​គេ​ក៏​ទិញ​ផ្ដាច់​កុងត្រា​កីឡាករ​រូប​នេះ​ពី Real Madrid តែ​ម្ដង។ បច្ចុប្បន្ន Fran Garcia បាន​ក្លាយ​ជា​កីឡាករ​ដ៏​លេច​ធ្លោរ និង​សំខាន់​សម្រាប់ Rayo Vallecano ហើយ​បាន​បង្ហាញ​ខ្លួន​ស្ទើរ​គ្រប់​ការ​ប្រកួត​ទាំង​អស់​របស់​ក្លឹប។

ខ្សែការពារ Fran Garcia នៅ​មាន​កុងត្រា​ជាមួយ Rayo Vallecano រហូត​ដល់​ខែ​មិថុនា ឆ្នាំ 2025 ប៉ុន្តែ​យោង​ទៅ​តាម​អ្នក​កាសែត​អ៊ីតាលី Fabrizio Romano បាន​រាយការណ៍​ថា គាត់​នឹង​ត្រឡប់​ទៅ Bernabeu ដែល​ជា​អតីត​ក្លឹប​ចាស់​របស់​ខ្លួន​វិញ​នៅ​ចុង​បញ្ចប់​នៃ​រដូវកាល​នេះ។ កិច្ចព្រម​ព្រៀង​ឯកសារ​បាន​ដំណើរ​ការ​រួចរាល់​ហើយ ដោយ Real Madrid នឹង​ចំណាយ​ប្រាក់​ផ្ទេរ 10 លានអឺរ៉ូ ខណៈ​ដែល​ពួក​គេ​បាន​លក់​គាត់​កាល​ពី 2021 ត្រឹមតែ 5 លាន​អឺរ៉ូ​តែ​ប៉ុណ្ណោះ។

ប្រភព: Sportsmole