បាល់ទាត់អន្តរជាតិ
ក្លឹបបិសាចក្រហម និងក្លឹបកាំភ្លើងធំ Arsenal កំពុងចាប់អារម្មណ៍ក្នុងការចុះហត្ថលេខាលើខ្សែបម្រើវ័យក្មេងមួយរូបរបស់ Celta Vigo
ក្លឹបបិសាចក្រហម Manchester United និងក្លឹបកាំភ្លើងធំ Arsenal ត្រូវបានគេរាយការណ៍ថា កំពុងមានចំណាប់អារម្មណ៍ក្នុងការចុះហត្ថលេខាលើខ្សែបម្រើរបស់ក្លឹប Celta Vigo គឺកីឡាករ Gabri Veiga។ កីឡាករវ័យ 20 ឆ្នាំរូបនេះ គឺជាកីឡាករដែលប្រសូត្រចេញពីថ្នាលយុវជនរបស់ក្លឹប Celta Vigo នេះផ្ទាល់តែម្ដង។
Gabri Veiga ត្រូវបានក្លឹបប្រូម៉ូតឡើងមកលេងជាមួយឈុតធំ និងបានបង្ហាញខ្លួនជាលើកដំបូងកាលខែកញ្ញាឆ្នាំ 2020 ហើយសរុបមកទល់ពេលនេះ គាត់បានបង្ហាញខ្លួនបាន 40 ប្រកួតមកហើយសម្រាប់ Celta Vigo។ យ៉ាងណាបច្ចុប្បន្នកីឡាករសញ្ជាតិអេស្ប៉ាញ Gabri Veiga បានក្លាយជាកីឡាករដ៏សំខាន់ទៅហើយសម្រាប់រដូវកាលឆ្នាំ 2022-2023 នេះ ដោយបានបង្ហាញខ្លួន 24 ប្រកួត និងរួមចំណែកស៊ុតបញ្ចូលទីបាន 6 គ្រាប់, Assists បាន 2 ដង។
យោងទៅតាមរបាយការណ៍ចុងក្រោយមួយពី AS បានឲ្យដឹងថា ទាំងក្លឹបកាំភ្លើងធំ Arsenal និង Manchester United សុទ្ធតែបានចាប់អារម្មណ៍ខ្លាំងចំពោះកីឡាករឆ្នើម ដែលកំពុងរះចែងចាំងនៅលីគកំពូលនៃប្រទេសអេស្ប៉ាញរូបនេះ។ Gabri Veiga នៅមានកុងត្រាជាមួយក្លឹបបច្ចុប្បន្នរបស់ខ្លួនរហូតដល់ឆ្នាំ 2026 ប៉ុន្តែបើយោងតាមស្ថានភាពដែលក្លឹបធំៗ 2 នៅអង់គ្លេសកំពុងចាប់អារម្មណ៍គាត់នោះ Celta Vigo ប្រហែលជាមិនអាចឃាត់ឃាំងគាត់បានឡើយ។ ពួកគេនឹងអាចលក់ Gabri Veiga នៅចុងបញ្ចប់នៃរដូវកាលនេះ ក្នុងតម្លៃ 30 លានផោន រឺអាចច្រើនជាងនេះដោយផ្អែកលើស្ថានភាពជាក់ស្ដែង។
ប្រភព: Sportsmole