Chelsea ហ៊ាន​ចាយ​ដល់ 100 លានអឺរ៉ូ ប្រសិន​បើ Real Madrid ព្រម​លក់​កីឡាករ​រូប​នេះ​ឲ្យ​ពួក​គេ

ម្ចាស់​ក្លឹប​តោខៀវ Chelsea លោក Todd Boehly កំពុង​ត្រៀម​ខ្លួន​រួច​ជា​ស្រេច ដើម្បី​ធ្វើ​ការ​ដាក់​សំណើរ​ផ្ទេរ ដ៏​គួរ​ឲ្យ​ចាប់​អារម្មណ៍​មួយ នៅ​ក្នុង​ទីផ្សារ​ដោះដូរ​កីឡាករ​នា​ចុង​បញ្ចប់​នៃ​រដូវកាល​នេះ ខណៈ​ដែល​គោលដៅ​នៃ​ការ​ចង់​បាន​របស់​ពួក​គេ​គឺ​ខ្សែ​បម្រើ​ឆ្នើម​មួយ​រូប​របស់​ក្លឹប​អធិរាជស Real Madrid។

ប្រធាន​ក្លឹប​តោខៀវ​ពេញ​ចិត្ត​យ៉ាង​ខ្លាំង​ជាមួយ​នឹង​សមត្ថភាព​របស់​កីឡាករ​សញ្ជាតិ​អ៊ុយរូហ្គាយ Federico Valverde។ យ៉ាង​ណា​លុយ​មិនមែន​ជា​បញ្ហា​ឡើយ​សម្រាប់​លោក Todd Boehly ដែល​ក្លឹប​កំពុង​ត្រូវ​ការ​ពង្រឹង​បន្ថែម​ទៀត​នៅ​តំបន់​បម្រើ​កណ្តាល ហើយ​ពួក​គេ​សុខ​ចិត្ត​ចំណាយ​ប្រាក់ 100 លានអឺរ៉ូ ដើម្បី​ចុះ​ហត្ថលេខា​លើ​កីឡាករ​ឆ្នើម​រូប​នេះ​មក​ពី​ទឹកដី​អេស្ប៉ាញ។

យោង​ទៅ​តាម​របាយការណ៍​ពី El Nacional បាន​ឲ្យ​ដឹង​ថា កាល​ពី​ដើម​ឆ្នាំ​នេះ ក្លឹប​តោខៀវ Chelsea ចំណាយ​ប្រាក់​ខ្ទង់ 600 លានអឺរ៉ូ ទៅ​លើ​ការ​នាំ​យក​កីឡាករ​ចំណូល​ថ្មី ប៉ុន្តែ​ទម្រង់​លេង​របស់​ក្រុម​នៅ​មិន​ទាន់​លេច​ធ្លោរ​ខ្លាំង​នោះ​ឡើយ ហើយ​ពួកគេ​ព្យាយាម​ចាយ​លុយ​បន្ថែម​ទៀត​ដើម្បី​ចុះ​ហត្ថលេខា​កីឡា​ចំណូល​ថ្មី​នៅ​រដូវ​ក្ដៅ​ខាង​មុខ។ កីឡាករ​ដែល​ជា​គោលដៅ​នៃ​ការ​ចង់​បាន​ខ្លាំង​បំផុត​របស់​គេ​គឺ​ខ្សែ​បម្រើ Federico Valverde។

ដោយ​ឡែក​បច្ចុប្បន្ន Federico Valverde ត្រូវ​បាន​គេ​ចាត់​ទុក​ថា ជា​កីឡាករ​ដ៏​សំខាន់​ម្នាក់​នៅ​ក្នុង​គម្រោង​របស់​លោក Carlo Ancelotti ហើយ​ត្រូវ​បាន​គេ​មើល​ឃើញ​ថា កីឡាករ​ឆ្នើម​រូប​នេះ គឺ​ជា​ផែនការ​រយៈពេល​វែង​របស់​ក្លឹប។ គាត់​ក៏​មិន​ចង់​ចាកចេញ​ពី La Liga ផង​ដែរ ខណៈ​ដែល​គាត់ និង​ប្រពន្ធ​របស់គាត់​ធ្លាប់​បាន​និយាយ​ជា​ច្រើន​ដង​មក​ហើយ​ថា គេ​ពេញ​ចិត្ត​នឹង​ជីវិត​នៅ​ក្នុង​ប្រទេស​អេស្ប៉ាញ។

ប្រភព: Sportskeeda