Jurgen Klopp ជម្រុញ​ឲ្យ​ក្លឹប​របស់​ខ្លួន​បន្ត​កុងត្រា​ថ្មី​ដល់ James Milner

គ្រូ​បង្វឹក​របស់​ក្លឹប​ហង្សក្រហម Liverpool លោក Jurgen Klopp ត្រូវ​បាន​គេ​រាយការណ៍​ថា ចង់​រក្សា​ទុក​ខ្សែបម្រើ​ចាស់​វស្សា James Milner បន្ត 1 ឆ្នាំ​ទៀត សម្រាប់​រដូវកាល​ក្រោយ។ យ៉ាង​ណា​មិញ កីឡាករ​វ័យ 37 ឆ្នាំ​រូបនេះ​នឹង​ក្លាយ​ជា​កីឡាករ​ដែល​គ្មាន​តម្លៃ​ខ្លួន​នៅ​ចុង​បញ្ចប់​នៃ​រដូវកាល ពេល​ដែល​កុងត្រា​របស់​គាត់​ផុត​កំណត់។

James Milner ត្រូវ​បាន​គេ​មើល​ឃើញ​​ថា នឹង​ចាកចេញ​ពី​ក្លឹប​ហង្សក្រហម ខណៈ​ដែល​ពួក​គេ​កំពុង​រៀបចំ​កែ​សម្រួល​នៅ​តំបន់​ខ្សែបម្រើ​របស់​ក្រុម​នៅ​រដូវក្ដៅ​នេះ​ផង​ដែរ។ បុរស​សញ្ជាតិ​អង់គ្លេស​រូប​នេះ មិន​សូវ​មាន​ឱកាស​បង្ហាញ​ខ្លួន​នៅ​លើ​ទីលាន​ប្រកួត ក្នុង​នាម​ជា​ជម្រើស​ដំបូង​របស់​ក្រុម​ប៉ុន្មាន​ឡើយ​​រដូវកាល​នេះ។

ប៉ុន្តែ​ភាព​ប៉ិនប្រសប់, បទ​ពិសោធន៍ និង​​លក្ខណៈ​​ជា​អ្នក​ដឹក​នាំ​របស់ James Milner បាន​ធ្វើ​ឲ្យ​គាត់​ក្លាយ​ជា​មនុស្ស​ម្នាក់​នៅ​តែ​សំខាន់​សម្រាប់​គ្រូ​បង្វឹក​លោក Jurgen Klopp។ អតីត​កីឡាករ​ក្រុម​ជម្រើសជាតិ​អង់គ្លេស​រូប​នេះ ក្លាយ​ជា​ជម្រើស​ដំបូង​ត្រឹមតែ 6 ប្រកួត​​ប៉ុណ្ណោះ ប៉ុន្តែ​គាត់​បាន​បង្ហាញ​ខ្លួន​សរុប 32 ប្រកួត​នៅ​រដូវកាល​នេះ។

យោងតាម Football Insider បាន​ឲ្យ​ដឹង​ថា ក្លឹប​ហង្សក្រហម Liverpool គ្រោង​នឹង​ផ្ដល់​កុងត្រា​ថ្មី​មួយ​ឆ្នាំ​ទៀត​ដល់ James Milner ដើម្បី​ឲ្យ​គាត់​បន្ត​ស្នាក់​នៅ Anfield រដូវកាល​ក្រោយ​ទៀត ដែល​ការ​សម្រេច​ចិត្ត​នេះ​ជា​ការ​ចង្អុល​បង្ហាញ​ពី​គ្រូ​បង្វឹក​របស់​ក្លឹប​គឺ​លោក Jurgen Klopp ផង​ដែរ។

ប្រភព: Sportsmole