Xhaka ប្រាប់​ថា ការ​ប៉ះជាមួយ​ហង្សក្រហម ក្នុង​ដី Anfield នៅតែ​ជា​រឿង​ដ៏​គួរ​ឲ្យ​ខ្លាច​រអារ

មុន​ការ​ប្រកួត​មក​ដល់ ខ្សែ​បម្រើ Granit Xhaka របស់​ក្លឹប​កាំភ្លើង​ធំ Arsenal បាន​លើក​ឡើង​​ថា Liverpool គឺ​ជា​ក្រុម​ដែល​ពិបាក​ក្នុង​ការ​យក​ឈ្នះ​បំផុត ក្នុង​ចំណោម​ក្រុម​មួយ​ចំនួន​ទៀត​នៅ​អង់គ្លេស។ យ៉ាង​ណា​មិញ Arsenal នឹង​ត្រូវ​តទល់​គ្នា​ជាមួយ​ហង្សក្រហម ក្នុង​ការ​ប្រកួត Premier League នៅ​ថ្ងៃ​ទី 9 ចុង​សប្ដាហ៍​នេះ។

Arsenal ដែល​បច្ចុប្បន្ន​កំពុង​ជា​ក្រុម​កំពូល​តារាង ត្រូវ​ព្យាយាម​ធ្វើ​យ៉ាង​ណា​ឈ្នះ​រាល់​ការ​ប្រកួត​ទាំង​អស់​ដែល​នៅ​សល់ ទើប​ពួក​គេ​មាន​ភាគរយ​ខ្ពស់ ក្នុង​ការ​ឈ្នះ​ពាន Premier League នៅ​រដូវកាល​នេះ ខណៈ​ដែល​ក្រុម​លេខ 2 Manchester City កំពុង​មាន​ពិន្ទុ​ប្រកៀក​ប្រកិត​នឹង​ពួក​គេ​ផង​ដែរ។

យ៉ាង​ណា​មិញ​ក្រុម​របស់​លោក Mikel Arteta មាន​ស្ថិតិ​មិន​សូវ​ល្អ​ឡើយ ជាមួយ​នឹង​ការ​ប្រកួត​ក្នុង​ដី Anfield របស់ Liverpool ដោយ​បាន​​ចាញ់ 3 ប្រកួត ក្នុង​ចំណោម 4 ប្រកួត​​ចុងក្រោយ​​របស់​​ពួកគេ និង​របូត​គ្រាប់​បាល់​សរុប​រហូត​ដល់ 12 គ្រាប់។

ទន្ទឹម​នឹង​នេះ​ដែរ ថ្លែង​ទៅ​កាន់​កាសែត Express មុន​ពេល​ការ​ប្រកួត​ដ៏​ធំ​នៅ Anfield កីឡាករ​សញ្ជាតិ​ស្វីស Granit Xhaka បាន​និយាយ​ថា៖ “មិនមាន​បញ្ហា​ថា តើ​រដូវកាល​នេះ ទម្រង់​លេង​របស់​ពួកគេ​ប្រែ​ទៅ​ជា​យ៉ាងណា​នោះ​ទេ។ Liverpool តែងតែ​ជា​ក្រុម​ដ៏​គ្រោះថ្នាក់ ហើយ​នៅ Anfield ជា​កន្លែង​ដែល​គូ​ប្រកួត​របស់​គេ​ពិបាក​លេង។ ប៉ុន្តែ​យើង​មាន​ទំនុក​ចិត្ត​គ្រប់គ្រាន់ ក្នុង​ការ​ឈ្នះ​នៅ​ទីនោះ​ផង​ដែរ។ នេះ​ជា​អ្វី​ដែល​យើង​នឹង​ព្យាយាម​ធ្វើ។… ដូច្នេះ​​ចាំ​​មើល​ថា តើ​យើង​អាច​យក 3 ពិន្ទុ​មក​វិញ រឺ​អត់”។

ប្រភព: Dailypost