Granit Xhaka ត្រៀម​ខ្លួន​ពាក់​ស្លាក​ប្រធាន​ក្រុម​ជា​ថ្មី​ម្ដង​ទៀត បន្ទាប់​ពី​ត្រូវ​បាន​គេ​ដកហូត​អស់​រយៈពេល​ជាង​ពីរ​ឆ្នាំ

ខ្សែ​បម្រើ Granit Xhaka បាន​បង្ហើប​ថា គាត់​បាន​ត្រៀម​ខ្លួន​រួច​ជាស្រេច ដើម្បី​ក្លាយ​ជា​ប្រធាន​ក្រុម​របស់​ក្លឹប​កាំភ្លើងធំ Arsenal ជា​ថ្មី​ម្តងទៀត បន្ទាប់​ពី​ត្រូវ​បាន​គេ​ដកហូត​អស់​រយៈពេល 2 ឆ្នាំកន្លះ។

Xhaka ត្រូវបាន​ដក​ចេញ​ពី​តំណែង​ជា​ប្រធាន​ក្រុម​កាំភ្លើងធំ​ក្នុង​ខែវិច្ឆិកា ឆ្នាំ 2019 បន្ទាប់​ពី​មាន​ការ​ផ្ទុះ​កំហឹងទល់​នឹង​អ្នកគាំទ្រ​របស់​ខ្លួន នៅ​ក្នុង​ការ​ប្រកួត​មួយ​ជា​មួយ Crystal Palace ។

ចាប់​តាំង​ពី​ពេលនោះ​មក ខ្សែបម្រើ​សញ្ជាតិ​ស្វីសរូប​នេះ ត្រូវបានគេ​គិត​ថា នឹង​អាច​ចាកចេញ​ពី​កីឡដ្ឋាន Emirates នៅ​រដូវកាល​បន្ទាប់។ ប៉ុន្តែ​កាល​ពី​ថ្មីៗ​នេះ គាត់​បាន​សារភាព​ថា គ្រូបង្វឹក​បច្ចុប្បន្ន​លោក Mikel Arteta បាន​បញ្ចុះបញ្ចូល​គាត់​ឲ្យ​ស្នាក់​នៅ​ជា​មួយ​ក្លឹប​រហូត​ដល់​ពេល​នេះ។

ដោយ​ឡែក​បច្ចុប្បន្ន​នេះ Xhaka គឺ​ជា​កីឡាករ​ដ៏​សំខាន់​មួយ​រូប​សម្រាប់​ក្រុម​កាំភ្លើងធំ Arsenal ដោយ​គាត់​បាន​បង្ហាញ​ខ្លួន​ច្រើន​ជាង 20 ប្រកួត នៅ​រដូវកាល​នេះ។ Granit Xhaka បាន​និយាយ​ទៅ​កាន់ Sky Sports កាល​ពី​ពេលថ្មីៗ​នេះ​ថា គាត់​បាន​ត្រៀម​ខ្លួន​រួច​ហើយ ក្នុង​ការ​ធ្វើ​ជា​ប្រធាន​ក្រុម​ជាថ្មី​ម្តង​ទៀត។ ហើយ​ខ្ញុំ​មិន​ដែល​គិតថា ខ្ញុំ​នឹង​អាច​មាន​ឱកាស​នេះ​ម្ដង​ទៀត​ទេ។

ប្រភព: 90 Min