គ្រូ​បិសាចក្រហម​ប្រាប់​ក្លឹប​របស់​ខ្លួន កុំ​ឲ្យ​លក់​ខ្សែការពារ​រូប​នេះ

គ្រូ​បង្វឹក​របស់​ក្លឹប​បិសាចក្រហម Manchester United លោក Erik ten Hag បាន​រារាំង​ការ​ប៉ុន​ប៉ង​របស់​ក្លឹប Eintracht Frankfurt ក្នុង​ការ​ចុះ​ហត្ថលេខា​លើ​ខ្សែការពារ Victor Lindelof នៅ​រដូវក្តៅ​នេះ។ Erik ten Hag បាន​ចាត់​ទុក Lindelof ជា​វត្ថុ​មួយ​ដែល​មិន​អាច​ប៉ះ​បាន ក្នុង​ចំណោម​កីឡាករ​ទាំង​អស់​របស់​ក្លឹប។

យ៉ាង​ណា​មិញ គ្រូ​បង្វឹក​សញ្ជាតិ​ហូឡង់​រូប​នេះ​បាន​ងាក​ទៅ​រក Lindelof បន្ទាប់​ពី​ការ​រង​របួស​រហូត​ដល់​ចប់​រដូវកាល​របស់ Lisandro Martinez កាល​ពី​ខែ​មេសា​កន្លង​ទៅ។ Lindelof បាន​លេង​ពេញ 90 នាទី ក្នុង​ការ​ប្រកួត​លីគ​ចំនួន 9 លើក​ចុង​ក្រោយ​របស់​បិសាចក្រហម និង​ FA Cup វគ្គ​ពាក់​កណ្តាល​ផ្តាច់ព្រ័ត្រ រួម​ទាំង​វគ្គ​ផ្ដាច់ព្រ័ត​ជាមួយ Manchester City ផង​ដែរ។

កាល​ពី​ខែមករា​កន្លង​ទៅ ខ្សែការពារ​របស់​ក្លឹប​បិសាចក្រហម​រូប​នេះ​ធ្លាប់​បាន​ទាក់ទង​ពី Inter Milan និង Atletico Madrid ប៉ុន្តែ​គ្រប់​យ៉ាង​មិន​បាន​កើត​ឡើង​ឡើយ ហើយ​ធ្វើ​ឲ្យ Lindelof បន្ត​ស្នាក់​នៅ​ទឹកដី​អង់គ្លេស​រហូត​មក​ដល់​ពេល​នេះ។ យោងតាម​របាយការណ៍​ពី Bild ថ្មីៗ​នេះ បាន​ឲ្យ​ដឹង​ថា Frankfurt ក៏​ជា​ក្លឹប​ដែល​ស្ថិត​ក្នុង​ចំណោម​ក្លឹប​ដែល​ព្យាយាម​ចុះ​ហត្ថលេខា​លើ Lindelof ដែរ ខណៈ​ដែល​ពួក​គេ​កំពុង​ស្វែងរក​អ្នក​ជំនួស Evan Ndicka ដែល​នឹង​ចាកចេញ​នៅ​ចុង​បញ្ចប់​នៃ​រដូវក្តៅនេះ។ ទោះ​ជា​យ៉ាង​ណា​ក៏​ដោយ Erik ten Hag ចង់​រក្សា Lindelof នៅ​បិសាចក្រហម​យ៉ាង​តិច​មួយ​រដូវកាល​ទៀត ដូច្នេះ​ទាំង Frankfurt និង​ក្លឹប​ផ្សេងៗ​ទៀត ពិត​ជា​មាន​ឱកាស​តិចតួច​បំផុត ក្នុង​ការ​ចុះ​ហត្ថលេខា​លើ​កីឡាករ​សញ្ជាតិ​ស៊ុយអែត​រូប​នេះ។

ប្រភព: Dailypost NG