Real Madrid នឹង​លក់​ខ្សែការពារ​រូប​នេះ​ទៅ​ឲ្យ​ក្លឹប​នៅ​អារ៉ាប៊ីសាអូឌីត ប្រសិន​បើ​ត្រូវ​ថ្លៃ

ខ្សែការពារ​ស្លាប Ferland Mendy ដែល​ជា​កីឡាករ​ឆ្នើម​ម្នាក់​របស់​ក្លឹប Real Madrid ត្រូវបាន​គេ​រាយការណ៍​ថា កំពុង​បើកចំហរ​ក្នុង​ការ​ចាកចេញ​ទៅ​លេង​នៅ​​ប្រទេស​អារ៉ាប៊ីសាអូឌីត ប្រសិន​បើ​មាន​សំណើរ​ជា​ទឹកប្រាក់​ដ៏​​ច្រើន​សន្ធឹកសន្ធាប់​​មួយ​អាច​កើត​ឡើង​សម្រាប់​កីឡាករ​សញ្ជាតិ​បារាំង​រូប​នេះ​បាន។

Ferland Mendy ដែល​បច្ចុប្បន្ន​មាន​វ័យ 28 ឆ្នាំ ត្រូវ​បាន​គេ​ដឹង​ថា ជា​ទីពេញ​ចិត្ត​របស់​លោក Carlo Ancelotti ប៉ុន្តែ​ក្នុង​គំនិត​របស់​ក្លឹប​គឺ​មិន​ទុក​ចិត្ត​លើ​សមត្ថភាព​របស់​ខ្សែការពារ​រូប​នេះ​ឡើយ ដោយសារ​ការ​រងរបួស​ជាច្រើន​នៅ​រដូវកាល​មុន ដោយ​ពេល​នោះ​គាត់​ចូល​លេង​បាន​ត្រឹមតែ 25 ប្រកួត​ប៉ុណ្ណោះ​សម្រាប់​ការ​ប្រកួត​ទាំងអស់​របស់ Real Madrid។

យោងតាម​ការ​ចុះ​ផ្សាយ​របស់​កាសែត MARCA កាល​ពី​ពេល​ថ្មីៗ​នេះ​បាន​ឲ្យ​ដឹង​ថា Ferland Mendy បាន​ទាក់ទាញ​ចំណាប់​អារម្មណ៍​ពី​ក្លឹប​នៅ Saudi Pro League ហើយ​ពួក​គេ​ចង់​ផ្ទេរ​គាត់​នា​រដូវក្ដៅ​នេះ។ ទន្ទឹម​នឹង​នេះ​ដែរ គេ​ដឹង​ថា គាត់​ក៏​ចង់​ទៅ​កើប​លុយ​ទីនោះ​ដែរ ហើយ​ក្លឹប​បច្ចុប្បន្ន​របស់​ខ្លួន​ក៏​ពេញ​ចិត្ត​នឹង​លក់​ខ្សែការពារ​រូប​នេះ ជា​មួយ​នឹង​ទឹកប្រាក់​ច្រើន​គួរ​សម​ផងដែរ ខណៈ​ដែល​កុងត្រា​របស់​គាត់​នៅ Santiago Bernabeu នៅ​មាន​សុពលភាព​រហូត​ដល់​ឆ្នាំ 2025។

ប្រភព: Sportskeeda