ឪពុក​របស់ Luis Diaz ប្រាប់​ថា កូន​ប្រុស​របស់​ខ្លួន​គឺ​ជា​អ្នកគាំទ្រ​ក្លឹប Barcelona

ថ្មីៗ​នេះ Luis Diaz ត្រូវ​បាន​គេ​ផ្សារ​ភ្ជាប់​ទំនាក់​ទំនង​ដ៏​គួរ​ឲ្យ​ភ្ញាក់​ផ្អើល ជា​មួយ​នឹង​ការ​ផ្លាស់​ទៅ​កាន់​ក្លឹប​អ្នក​មាន​បុណ្យ Barcelona ហើយ​ស្រប​ពេល​ជាមួយ​គ្នា​នេះ​ដែរ ឪពុក​របស់​គាត់​បាន​បង្ហើប​នូវ​រឿង​រ៉ាវ​ពិត​មួយ​របស់ Luis Diaz ដែល​គេ​ជា​អ្នកគាំទ្រ និង​ចង់​លេង​ឲ្យ​ក្លឹប​យក្ស​អេស្ប៉ាញ​មួយ​នេះ​ថែម​ទៀត​ផង។

ឪពុក​របស់​​កីឡាករ​ឆ្នើម​នៃ​ក្លឹប​ហង្សក្រហម Liverpool រូប​នេះ ទើប​នឹង​ត្រូវ​បាន​គេ​ដោះលែង​ពី​ការ​ចាប់​ជំរិត​កាល​ពី​ប៉ុន្មាន​ថ្ងៃ​មុន​ប៉ុណ្ណោះ និង​បាន​ជួប​ជុំគ្រួសារ​របស់​គាត់​​វិញ។ លោក Luis Manuel Diaz ដែល​ជា​ឪពុក​របស់ Luis Diaz ត្រូវ​បាន​គេ​សួរ​អំពី​ពាក្យ​ចចាម​អារ៉ាម​ពាក់ព័ន្ធ​នឹង​កូនប្រុស​របស់​គាត់​ជាមួយ​នឹង​ការ​ផ្លាស់​ទៅ Camp Nou ពេល​នោះ​គាត់​បាន​បញ្ជាក់​យ៉ាង​ច្បាស់​ថា កូនប្រុស​របស់​គាត់​គឺ​ជា​អ្នកគាំទ្រ​ដ៏​ស្មោះស្ម័គ្រ​ចំពោះ​ក្លឹប Barcelona។

គាត់​បាន​ប្រាប់​ទៅ​កាន់ Win Sports ថា៖ “វា​ជា​ការ​ពិត​ដែល Luis Diaz គឺ​ជា​អ្នក​គាំទ្រ​ក្លឹប Barcelona ដ៏​ស្មោះ​ស្ម័គ្រ​ម្នាក់ ហើយ​​សុបិន​របស់​គាត់​នឹង​ក្លាយ​ជា​ការពិត ប្រសិន​បើ​គាត់​អាច​ផ្ទេរ​ទៅ​ទីនោះ។ រហូត​មក​ដល់​ពេល​នេះ ខ្ញុំ​ចង់​អរគុណ​ដល់ Porto និង Liverpool សម្រាប់អ្វី​ដែល​ពួក​គេ​បាន​ធ្វើ​ចំពោះ​គាត់ និង​អ្វី​ដែល​គាត់​ទទួល​បាន។… វា​នឹង​គ្មាន​បញ្ហា​ទេ ប្រសិន​បើ Luis Diaz មក Barcelona ព្រោះ​គេ​ជាក្រុម​កំពូល​មួយ និង​ជា​ក្រុម​ដ៏​ល្អ​បំផុត​មួយ​នៅ​ក្នុង​ពិភព​លោក”។

ប្រភព: Barcablaugranes