បាល់ទាត់អន្តរជាតិ
Liverpool និង Chelsea ចាប់អារម្មណ៍ខ្លាំងលើ Guimaraes
ក្លឹបហង្សក្រហម Liverpool និងតោខៀវ Chelsea ត្រូវបានគេរាយការណ៍ថា បានចាប់អារម្មណ៍ខ្លាំង ក្នុងការចុះហត្ថលេខាលើខ្សែបម្រើ Bruno Guimaraes របស់ក្លឹប Newcastle United។ ពិតជាគ្មានការលាក់បាំងឡើយ ដែលកីឡាករសញ្ជាតិប្រេស៊ីលរូបនេះ ត្រូវបានក្លឹបធំៗជាច្រើនចាប់អារម្មណ៍ចង់បាន ព្រោះតែទម្រង់លេងដ៏លេចធ្លោររបស់គាត់។
កីឡាករវ័យ 26 ឆ្នាំរូបនេះបានក្លាយជាផ្នែកមួយដ៏សំខាន់ក្រោមការដឹកនាំរបស់គ្រូបង្វឹកលោក Eddie Howe។ Bruno Guimaraes តែងតែជាជម្រើសដ៏សំខាន់របស់ក្រុម ចាប់តាំងមកដល់របស់គាត់ក្នុង ខែមករា ឆ្នាំ 2022។ គិតមកទល់នឹងពេលនេះ គាត់បានបង្ហាញខ្លួនចំនួន 86 ប្រកួតមកហើយសម្រាប់ Newcastle ដោយស៊ុតបញ្ចូលទីបាន 11 គ្រាប់ និងបញ្ជូនបាល់ឲ្យមិត្តរួមក្រុមបានចំនួន 9 ដង។
ស្របពេលជាមួយគ្នានេះដែរ ពេលនេះ Newcastle បានជួបនឹងហានិភ័យពាក់ព័ន្ធនឹងច្បាប់ប្រាក់ចំណូលចំណាយ ហើយពួកគេត្រូវបានគេដឹងថា នឹងត្រូវបង្ខំចិត្តលក់កីឡាករឆ្នើមដែលមានប្រាក់ពលកម្មថ្លៃ យ៉ាងហោចណាស់ម្នាក់ ហើយ Bruno Guimaraes ជាបេក្ខភាពកីឡាករដែលអាចលក់ចេញផងដែរ។
យោងតាមសារព័ត៌មានអេស្ប៉ាញ Diario AS បានឲ្យដឹងថា Liverpool និង Chelsea ជាក្លឹបធំ 2 នៅអង់គ្លេស ដែលកំពុងបង្ហាញចំណាប់អារម្មណ៍លើខ្សែបម្រើឆ្នើម Bruno Guimaraes។ ដូចគ្នានេះដែរ Newcastle នឹងពិចារណាលក់ Guimaraes នៅរដូវក្តៅនេះ ជាមួយនឹងលក្ខខណ្ឌផ្ទេរចេញដែលត្រូវបានគេប៉ាន់ស្មានថា ប្រហែលជាខ្ទង់ 115 លានអឺរ៉ូ។
ប្រភព: Sportsmole