Man City នឹង​ឲ្យ​ប្រាក់​ខែ Mbappe ខ្ពស់​ជាង​គេ​បំផុត​នៅ​ក្លឹប​របស់​ខ្លួន ប្រសិន​បើ​ខ្សែប្រយុទ្ធ​រូប​នេះ ព្រម​ចូលរួម​ជា​មួយ​ពួក​គេ

យោងតាម​របាយការណ៍​ចុង​ក្រោយ​មួយ​បាន​ឲ្យ​ដឹង​ថា ក្លឹប​មេឃខៀវ Manchester City នឹង​ព្យាយាម​ប្រជែង​ជាមួយ Real Madrid ក្នុង​ការ​ចុះ​ហត្ថលេខា​លើ Kylian Mbappe ខណៈ​ដែល​ខ្សែប្រយុទ្ធ​ឆ្នើម​រូប​នេះ នៅ​មិន​ទាន់​ប្រកាស​ជា​ផ្លូវការណ៍​ថា គាត់​នឹង​ចូលរួម​ជាមួយ​ក្លឹប​ណា​នៅ​រដូវកាល​ក្រោយ។

យ៉ាង​ណា​មិញ កីឡាករ​វ័យ 25 ឆ្នាំ​រូបនេះ​បាន​ប្រាប់​ដល់​ក្លឹប​បច្ចុប្បន្ន​របស់​ខ្លួន Paris Saint-Germain រួច​ហើយ​ថា គាត់​នឹង​ចាកចេញ​ពី​ទឹកដី​បារាំង នៅ​ពេល​ដែល​កុងត្រា​ផុត​កំណត់ នា​ចុង​បញ្ចប់​នៃ​រដូវកាល​នេះ។ ដោយ​ឡែក Kylian Mbappe បាន​ប្រកប​អាជីព​របស់​ខ្លួន​ជាមួយ PSG រយៈពេល 7 ឆ្នាំ​មក​ហើយ គិត​ចាប់​តាំង​ពី​ពេល​ដែល​គាត់​បាន​ផ្ទេរ​ពី Monaco កាល​ពី​ឆ្នាំ 2018។

Kylian Mbappe ​ត្រូវ​បាន​គេ​និយាយ​ថា បាន​ព្រមព្រៀង​ចុះ​កុងត្រា​រយៈពេល 5 ឆ្នាំ​រួច​ហើយ​ជាមួយ​ក្លឹប Real Madrid ខណៈ​ដែល​ប្រធាន​ក្លឹប​លោក Florentino Perez ក៏​បាន​ជូន​ដំណឹង​អំពី​រឿង​នេះ​ទៅ​ដល់​កីឡាករ​មួយ​ចំនួន​របស់​ខ្លួន​រួច​ហើយ​ផង​ដែរ។

ទោះ​បី​ជា​បែប​នេះ​ក៏​ដោយ Real Madrid នៅ​តែ​ជួប​ហានិភ័យ​ពី​ទឹកប្រាក់​ដ៏​ធំ​របស់ Man City ដែល​យោងតាម​របាយការណ៍​ពី Fichajes បាន​រាយការណ៍​ថា ក្លឹប​យក្ស​របស់​អង់គ្លេស​មួយ​នេះ នឹង​ព្យាយាម​ធ្វើអ្វីៗ​គ្រប់​យ៉ាង​តាម​ដែល​អាច​ធ្វើ​ទៅ​បាន ក្នុង​ការ​ផ្លាស់ប្ដូរ​ចិត្ត Mbappe ឲ្យ​មក​ចូល​រួម​ជាមួយ​ពួក​គេ។

តាម​របាយការណ៍​ដដែល​នេះ​ដែរ​បាន​បន្ថែម​ឲ្យ​ដឹង​ថា ក្រុម​របស់​លោក Pep Guardiola នឹង​ផ្ដល់​ប្រាក់​ពលកម្ម​ដល់ Mbappe ឲ្យ​ក្លាយ​ជា​កីឡាករ​ដែល​មាន​ប្រាក់​ខែ​ខ្ពស់​បំផុត​របស់​ក្លឹប​ លើស​ពី​ខ្សែប្រយុទ្ធ Erling Haaland ទៅ​ទៀត ខណៈ​ដែល​គេ​បាន​ដឹង​ថា Haaland មាន​ប្រាក់​ខែ​រហូត​ដល់ 400,000 ផោន​ក្នុង​មួយ​សប្តាហ៍។

ប្រភព: Sportsmole