Barcelona នឹង​សុខ​ចិត្ត​លក់​កីឡាករ​ឆ្នើម​របស់​ខ្លួន ដើម្បី​តាម​ប្រមាញ់ Alphonso Davies ពី​កណ្ដាប់​ដៃ​របស់ Real Madrid

បញ្ហា​ហិរញ្ញវត្ថុ​នៅ​តែ​ជា​បញ្ហា​សម្រាប់ Barcelona ហើយ​ពួក​គេ​នឹង​ត្រូវ​បង្ខំ​ចិត្ត​លក់​កីឡាករ​ឆ្នើមៗ​មួយ​ចំនួន ទើប​អាច​មាន​លទ្ធភាព​ចុះ​ហត្ថលេខា​លើ​កីឡាករ​ចំណូល​ថ្មី​បាន។ ដោយ​ឡែក​ថ្មីៗ​នេះ យោងតាម​របាយការណ៍​ពី Fichajes បាន​ឲ្យ​ដឹង​ថា Barcelona បាន​ចាប់​អារម្មណ៍​ក្នុង​ការ​ចុះ​ហត្ថលេខា​លើ​ខ្សែការពារ Alphonso Davies របស់ Bayern Munich។

ខ្សែការពារ​រូប​នេះ នៅ​មាន​កុងត្រា​ជាមួយ​ក្លឹប​បច្ចុប្បន្ន​របស់​ខ្លួន​រហូត​ដល់​ឆ្នាំ 2025 ដែល​ច្បាស់​ណាស់​ថា តម្លៃ​ខ្លួន​របស់​គាត់​នៅ​មាន​តម្លៃ​ថ្លៃ​គួរ​សម។ ស្រប​ពេល​ជា​មួយ​គ្នា​នោះ ក្លឹប​អធិរាជស Real Madrid ក៏​ពេញ​ចិត្ត​សមត្ថភាព និង​ចង់​បាន Alphonso Davies ដូច​ទៅ​នឹង Barcelona ដែរ។

របាយការណ៍​ជា​ច្រើន​បាន​អះអាង​ថា Barcelona បាន​ត្រៀម​ខ្លួន​រួច​ជា​ស្រេច ក្នុង​ការ​ស្វែងរក​ឱកាស​លក់​ខ្សែ​ប្រយុទ្ធ​ស្លាប Rafinha ខណៈ​ដែល​កីឡាករ​សញ្ជាតិ​ប្រេស៊ីល​រូប​នេះ កំពុង​ទទួល​បាន​ការ​ចាប់​អារម្មណ៍​ខ្លាំង​ពី​ក្លឹប​ចំនួន 5 នៅ Premier League។ ដូច្នេះ​ហើយ Barceloa កំពុង​មាន​សង្ឃឹម​ថា នឹង​អាច​ទទួល​បាន​ប្រាក់​ធំ ដែល​អាច​សង​ថ្លៃ​ពួក​គេ​ធ្លាប់​ចំណាយ 58 លានអឺរ៉ូ ទៅ​លើ​ខ្សែ​ប្រយុទ្ធ​ជំនាញ​ជើង​ឆ្វេង​រូប​នេះ នៅ​រដូវក្តៅ​ឆ្នាំ 2022។ ប្រាក់​ទាំង​នោះ ក៏​អាច​ធ្វើ​ឲ្យ​ពួក​គេ​សម្រេច​ក្ដី​ស្រមៃ​ក្នុង​ការ​ផ្ទេរ​ខ្សែការពារ​ឆ្វេង​ល្បឿន​លឿន Alphonso Davies ផង​ដែរ។

ប្រភព: Dailysports