Man United ត្រៀម​ចុះ​ហត្ថលេខា​លើ Gutierrez ដើម្បី​ដោះស្រាយ​បញ្ហា​របួស​របស់ Luke Shaw

ក្លឹប​បិសាចក្រហម Manchester United ត្រូវ​បាន​គេ​រាយការណ៍​ថា កំពុង​ស្វែងរក​លទ្ធភាព​នៃ​ការ​ចុះ​ហត្ថលេខា​លើ​ខ្សែការពារ​របស់​ក្លឹប Girona គឺ​កីឡាករ Miguel Gutierrez។ យ៉ាង​ណា​មិញ​ក្រុម​របស់​លោក Erik ten Hag នឹង​ស្វែងរក​ខ្សែ​ការពារ​ស្លាប​ឆ្វេង​ម្នាក់​នៅ​រដូវក្តៅ​នេះ ដោយ​សារ​តែ​បញ្ហា​របួស​ញឹកញាប់​របស់ Luke Shaw។

ខ្សែការពារ​សញ្ជាតិ​អង់គ្លេស Luke Shaw ដែល​បច្ចុប្បន្ន​មាន​វ័យ 28 ឆ្នាំ បាន​ចូល​លេង​ត្រឹមតែ 15 ប្រកួត​ប៉ុណ្ណោះ​នៅ​ក្នុង​ការ​ប្រកួត​ទាំងអស់​របស់​បិសាចក្រហម​នា​រដូវកាល​នេះ ដោយ​សារតែ​បញ្ហា​សាច់ដុំ និង​របួស​ផ្សេងៗ​ទៀត​តាម​រំខាន។ Man United នៅ​មាន​បេក្ខភាព​ខ្សែការពារ​ឆ្វេង​ម្នាក់​ទៀត​គឺ Tyrell Malacia តែ​ក៏​របួស​ដូចគ្នា ស្រប​ពេល​ដែល​រដូវកាល​នេះ គេ​មិន​ទាន់​បាន​លេង​ប្រកួត​សាច់​ការ​ណា​មួយ​នៅ​ឡើយ​ទេ ហើយ​កីឡាករ​សញ្ជាតិ​ហូឡង់​រូប​នេះ ទើប​នឹង​បាន​ជា​សះស្បើយ​ពី​ការ​វះកាត់​ជង្គង់​កាល​ពី​ពេល​ថ្មីៗ​នេះ​ប៉ុណ្ណោះ។

ជាមួយ​នឹង​កង្វះខាត​ខ្សែការពារ​ឆ្វេង គ្រូ​បង្វឹក​របស់​បិសាចក្រហម​បាន​ប្រើប្រាស់ Victor Lindelof និង Sofyan Amrabat ជា​អ្នក​រ៉ាប់​រង​តំណែង​នោះ ហើយ​បើ​យោង​តាម​របាយការណ៍​ពី Mundo Deportivo បាន​ឲ្យ​ដឹង​ថា ក្លឹប​គ្រោង​នឹង​នាំយក​ខ្សែការពារ​ស្លាប​ឆ្វេង​ថ្មី​ម្នាក់​ទៀត នៅ​ចុង​បញ្ចប់​នៃ​រដូវកាល​នេះ។

គេ​បាន​ដឹង​ថា បិសាចក្រហម ចាប់​អារម្មណ៍​ខ្លាំងលើ​អតីត​ខ្សែការពារ​របស់​ក្លឹប Real Madrid គឺ​កីឡាករ Miguel Gutierrez ដែល​បច្ចុប្បន្ន​កំពុង​លេង​ឲ្យ​ក្លឹប Girona។ កីឡាករ​វ័យ 22 ឆ្នាំ​រូប​នេះ​ពិត​ជា​គួរ​ឲ្យ​ចាប់អារម្មណ៍​ខ្លាំង ជាមួយ​នឹង​ការ​បង្ហាញ​សមត្ថភាព​សម្រាប់ Girona ក្នុង​រដូវកាល​នេះ ដោយ​ស៊ុតបញ្ចូលទី​បាន​ម្ដង និង​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 6 ដង ក្នុង​ការ​បង្ហាញ​ខ្លួន 30 ប្រកួត។

ប្រភព: Sportsmole