Aston Villa ដណ្ដើម​បាន​កៅអី​លេង UEFA Champions League ជា​លើក​ដំបូង ក្រោយ​ខកខាន​តាំង​ពី​ឆ្នាំ 1983 មក

Aston Villa ប្រហែល​ជា​ត្រូវ​អរគុណ​ចំពោះ​ជ័យ​ជម្នះ​របស់ Manchester City ដែល​បំបាក់​ទៅ​លើ Tottenham Hotspur ក្នុង​លទ្ធផល 2-0 កាល​ពី​ម្សិលមិញ ដែល​ធ្វើ​ឲ្យ​ពួក​គេ​បាន​ស្ថិត​នៅ​ក្នុង​ចំណោម​ក្រុម​ទាំង 4 របស់​ក្រប​ខ័ណ្ឌ Premier League សម្រាប់​ការ​ទទួល​បាន​​កៅអី​ប្រកួត​ប្រជែង UEFA Champions League រដូវកាល​ក្រោយ (2024/2025)។

យ៉ាង​ណា​មិញ ខណៈ​ដែល​ការ​ប្រកួត​នៅ​សល់​ត្រឹម​តែ 1 ទៀត​ប៉ុណ្ណោះ មុន​បិទ​រដូវកាល​នៅ​លីគ​កំពូល​របស់​អង់គ្លេស យើង​បាន​រក​ឃើញ​ក្រុម​ទាំង 4 ដែល​នឹង​មាន​កៅអី​លេង UCL ឆ្នាំ​ក្រោយ មាន​ដូច​ជា៖ Manchester City, Arsenal, Liverpool និង Aston Villa។

សម្រាប់​ក្រុម​ដែល​នឹង​លើក​ពាន​លីគ​នៅ​មិន​ទាន់​អាច​កំណត់បាន​នៅ​ឡើយ​ទេ ដោយ​រងចាំ​ប្រកួត​ចុង​ក្រោយ​មួយ​ប្រកួត​ទៀត។ ក្រុម 2 ដែល​កំពុង​មាន​ពិន្ទុ​ក្បែរ​គ្នា​បំផុត​គឺ Arsenal និង Man City ដោយ​ក្នុង​ចំណោម​ពួក​គេ​នឹង​មាន​មួយ​ក្រុម​អាច​ឈ្នះពាន Premier League ប៉ុន្តែ​បើ​យោងតាម​ស្ថានភាព​បច្ចុប្បន្ន Man City មាន​ប្រៀប​ជាង ព្រោះ​ពួក​គេ​មាន​ពិន្ទុ​លើ Arsenal 2 ពិន្ទុ។

គួរ​ដឹង​ផង​ដែរ​ថា ពេលវេលា​ចុងក្រោយ​ដែល Aston Villa មាន​វត្តមាន​ក្នុង​ការ​ប្រកួត UEFA Champions League គឺ​តាំង​ពី​រដូវកាល​ឆ្នាំ 1982/1983 មក​ម្ល៉េះ ដែល​ពេល​នោះ​គេ​ដាក់​ឈ្មោះ​ការ​ប្រកួត​ពាន​នេះ​ថា​ជា European Cup។ ទោះ​ជា​យ៉ាង​ណា​ក្លឹប Aston Villa ធ្លាប់​បាន​ឈ្នះ European Cup នៅ​រដូវ​កាល​ឆ្នាំ 1981/1982 ដែល​ពេល​នោះ​ពួក​គេ​បាន​យក​ឈ្នះ Bayern Munich ក្នុង​វគ្គ​ផ្តាច់​ព្រ័ត្រ។

ប្រភព: Dailysports