Mats Hummels នឹង​ចូលរួម​ជាមួយ​ក្លឹប​យក្ស​មួយ ក្នុង​ប្រទេស​អ៊ីតាលី

ក្លឹប​អ៊ីតាលី AS Roma កំពុង​ត្រៀម​លូកដៃ​ចូល​ក្នុង​ទីផ្សារ​ដោះដូរ​កីឡាករ​នា​រដូវក្ដៅ​នេះ ជាមួយ​នឹង​គោលដៅ​នៃ​ការ​ចុះ​ហត្ថលេខា​លើ​កីឡាករ​មួយ​ចំនួន​ធំ។ យ៉ាង​ណា​មិញ គ្រូ​បង្វឹក​លោក Daniele De Rossi ត្រូវ​បាន​គេ​និយាយ​ថា បាន​ទាមទារ​ដល់​ប្រធាន​ក្លឹប​រួច​ហើយ អំពី​ការ​ចង់​បាន​កីឡាករ​ចំណូល​ថ្មី។

គ្រូ​បង្វឹក​សញ្ជាតិ​អ៊ីតាលី​រូប​នេះ មាន​ការ​ស្នើ​សុំ​ចុះ​ហត្ថលេខា​លើ​កីឡាករ​ថ្មី​ចំនួន 6 នាក់ ដែល​ក្នុង​នោះ​រួមបញ្ចូល​ទាំង​ខ្សែ​ការពារ 2, ខ្សែ​ការពារ​កណ្តាល​ម្នាក់, ខ្សែបម្រើ​ម្នាក់ និង​ខ្សែ​ប្រយុទ្ធ 2។ យោងតាម​របាយការណ៍​ពី Calciomercato បាន​រាយការណ៍​ថា សម្រាប់​ការ​ពង្រឹង​នៅ​តំបន់​ការពារ គ្រូបង្វឹក​រូប​នេះ​ចង់​បាន​កីឡាករ​ដែល​សម​នឹង​ទម្រង់​របស់​គាត់ ហើយ​កីឡាករ​រូប​នោះ​គឺ Mats Hummels។

អាស្រ័យ​ហេតុ​នេះ​ហើយ ក្លឹប AS Roman កំពុង​ផ្តួច​ផ្តើម​គំនិត​នៃ​ការ​ពិភាក្សា​ជាមួយ​អ្នក​តំណាង​របស់​កីឡាករ​សញ្ជាតិ​អាឡឺម៉ង់​វ័យ 35 ឆ្នាំ​រូបនេះ​នា​ពេល​ឆាប់ៗ​ខាង​មុខ។ ទន្ទឹម​នឹង​នេះ​ដែរ Mats Hummels មាន​បំណង​ចង់​បន្ត​អាជីព​របស់​គាត់​ដោយ​លេង​ឲ្យ​ក្លឹប​នៅ​តំបន់​អឺរ៉ុប និង​ចង់​សាកល្បង​បទពិសោធន៍​ថ្មី​នៅ​ខាង​ក្រៅ​ប្រទេស​អាឡឺម៉ង់ ដូច្នេះ​គាត់​អាច​នឹង​ព្រមព្រៀង​ដើម្បី​ចូលរួម​ជាមួយ AS Roma នា​រដូវក្ដៅ​នេះ។

ប្រភព: Dailysports