តើ​ព័រទុយហ្គាល់ ធ្លាប់​ឈ្នះ​ពាន​ធំៗ​អ្វី​ខ្លះ​នៅ​ក្នុង​ប្រវត្តិសាស្ត្រ​របស់​ពួកគេ?

នៅ​ពេល​ដែល​អ្នក​និយាយ​ពី​ឈ្មោះ​របស់​ព័រទុយហ្គាល់ អ្នក​នឹង​នឹក​ឃើញ​មុន​គេ​ទៅ​ដល់​ខ្សែ​ប្រយុទ្ធ Cristiano Ronaldo ដែល​បច្ចុប្បន្ន គឺ​ជា​កាពីតែន​ក្រុម​ជម្រើស​ជាតិ។ ទោះ​ជា​យ៉ាង​ណា​ក៏​ដោយ ខណៈ​ដែល​មាន​វ័យ 39 ឆ្នាំ ខ្សែ​ប្រយុទ្ធ​រូប​នេះ ប្រហែល​ជា​កំពុង​ត្រៀមខ្លួន​លាខ្លួន​លា​អ្នក​គាំទ្រ​របស់​គាត់​ហើយ បន្ទាប់​ពី​ចប់​ព្រឹត្តិការណ៍ Euro 2024។

ដោយ​ឡែក ថ្វី​ត្បិតតែ​​ព័រទុយហ្គាល់ ជា​ប្រទេស​មួយ​ដែល​សំបូរ​ដោយ​ធនធាន​កីឡាករ និង​មាន​លីគ​កំពូល​ដែល​លេច​ធ្លោរ​គួរ​សម​ក្នុង​តំបន់​អឺរ៉ុប ប៉ុន្តែ​ប្រវត្តិនៃ​ការ​ឈ្នះពាន​របស់​ពួក​គេ​មិន​មាន​ភាព​លេច​ធ្លោរ​ខ្លាំង​ឡើយ។ អាច​និយាយ​បាន​ថា Cristiano Ronaldo គឺ​ជា​មនុស្ស​ម្នាក់​ដែល​រួម​ចំណែក​ដ៏​ធំ ក្នុង​ប្រវត្តិសាស្ត្រ​បាល់ទាត់​របស់​ព័រទុយហ្គាល់ ព្រោះ​មុន​ពេល​មាន​វត្តមាន​របស់ CR7 ក្រុម​ជម្រើស​ជាតិ​នៃ​ប្រទេស​នេះ​តែងតែ​ត្រូវ​បាន​គេ​មើល​រំលង។

ងាក​មក​មើល​ប្រវត្តិសាស្ត្រ​នៃ​ការ​ឈ្នះពាន​របស់​ព័រទុយហ្គាល់។ ការ​ទទួល​បាន​ជ័យ​ជម្នះ 1-0 របស់​ព័រទុយហ្គាល់​ទៅ​លើ​បារាំង ក្នុង​វគ្គ​ផ្ដាច់ព្រ័ត Euro 2016 គឺ​ជា​ពាន​រង្វាន់​ដ៏​សំខាន់ និង​ធំ​ដំបូង​បំផុត​របស់​ពួកគេ។ គ្រាប់​បាល់ 1 គ្រាប់​នៅ​ពេល​នោះ​គឺ​ជា​ការ​ស៊ុត​បញ្ចូលទី​របស់ Eder នៅ​នាទីទី 109។

ប៉ុន្មាន​ឆ្នាំ​ក្រោយ​មក​ទៀត នៅ​រដូវកាល 2018–2019 ព័រទុយហ្គាល់​ក៏​បាន​ឈ្នះ UEFA Nations League ដោយ​ពួក​គេ​បាន​យក​ឈ្នះ​ទៅ​លើ​ហូឡង់ ក្នុង​វគ្គ​ផ្ដាច់ព្រ័ត ជាមួយ​នឹង​លទ្ធផល 1-0 ហើយ​កីឡាករ​ដែល​ស៊ុត​បញ្ចូលទី​គឺ Goncalo Guedes។ ជា​សរុប ពានរង្វាន់​របស់​ព័រទុយហ្គាល់​មាន​តែ 2 នេះ​ប៉ុណ្ណោះ ហើយ​បើ​មើល​ទៅ​ការ​ប្រកួត FIFA World Cup វិញ ពួក​គេ​មិន​ដែល​សូម្បីតែ​លេង​ក្នុង​វគ្គ​ផ្ដាច់ព្រ័ត។

ប្រភព: Telecomasia