La Liga ប្រកាស​ប្រើប្រាស់​បច្ចេកវិទ្យា​ចាប់​បាល់ Offside ដោយ​ស្វ័យ​ប្រវត្តិ សម្រាប់​រដូវកាល​ថ្មី​ខាង​មុខ​នេះ

រដូវកាល​ក្រោយ La Liga នឹង​មាន​ការ​ដាក់​បច្ចេកវិទ្យា​នៃ​ការ​ច្នៃប្រឌិត​មួយ ដែល​ជះឥទ្ធិពល​យ៉ាង​ខ្លាំង​ដល់ការ​ប្រកួត​របស់​ខ្លួន។ យ៉ាង​ណា​មិញ La Liga បាន​ប្រកាស​ជា​ផ្លូវការណ៍​ថា ចាប់​ពី​រដូវកាល​ថ្មី​ខាង​មុខ​នេះ ការ​ប្រកួត​លីគ​នឹង​មាន​ដាក់​ប្រព័ន្ធ​ចាប់​បាល់ Offside ដោយ​ស្វ័យ​ប្រវត្តិ ដែល​បច្ចុប្បន្ន​បច្ចេកវិទ្យា​នេះ​កំពុង​ប្រើប្រាស់​នៅ Euro 2024 និង​បាន​សាកល្បង​ដោយ​ជោគ​ជ័យ​នៅ World Cup 2022។

ដូច្នេះ​ហើយ​ពេល​នេះ La Liga បាន​ក្លាយ​ជា​លីគ​កំពូល​ដំបូង​គេ ដែល​ទទួល​យក​បច្ចេកវិទ្យា​នៃ​ការ​ចាប់​បាល់ Offside ដោយ​ស្វ័យ​ប្រវត្តិនេះ។ ផ្ទុយ​មក​វិញ គួរ​ចាប់​អារម្មណ៍​ផង​ដែរ​ថា La Liga នៅ​មិន​ទាន់​មាន​បច្ចេកវិទ្យា Goal-line នោះ​ទេ ដែល​នាំ​ឲ្យ​មាន​ភាព​ចម្រូង​ចម្រាស​យ៉ាង​ខ្លាំង ក្នុង​អំឡុង​ពេល​ប្រកួត El Clasico ចុង​ក្រោយ​របស់​ពួក​គេ។

សម្រាប់​រដូវកាល​ថ្មី​របស់​លីគ​កំពូល​នៃ​ប្រទេស​អេស្ប៉ាញ La Liga 2024/2025 នឹង​ចាប់​ផ្តើម​នៅ​ថ្ងៃទី 15 ខែ​សីហា ជាមួយ​នឹង​ក្រុម​ដែល​​ប្រកួត​បើក​ឆាក​គឺ Getafe ទល់​នឹង Athletic Bilbao។

ប្រភព: Dailysports