គ្រូ​បង្វឹក​របស់​ក្លឹប Monaco បញ្ជាក់​ថា ពួក​គេ​ជិត​បង្ហាញ​មុខ​កីឡាករ​ចំណូល​ថ្មី Minamino ហើយ!!!

លោក Philippe Clement ដែល​បច្ចុប្បន្ន​គឺ​ជា​គ្រូ​បង្វឹក​របស់​ក្លឹប Monaco បាន​បញ្ជាក់​ថា ខ្សែប្រយុទ្ធ​របស់​ក្លឹប​ហង្សក្រហម Liverpool គឺ​កីឡាករ Takumi Minamino ជិត​ឈាន​ដល់​ការ​សម្រេច​​ចុះ​កុងត្រា​ជា​មួយ​ក្លឹប​របស់​លោក​ហើយ។

ដោយ​ឡែក​កិច្ចព្រមព្រៀង​​មួយ​ត្រូវបាន​កើត​ឡើង រវាង​ក្លឹប​ទាំង​ពីរ​កាល​ពី​ថ្ងៃអង្គារ​សប្ដាហ៍​នេះ។ ក្លឹប​មក​ពី​ប្រទេស​បារាំង Monaco បាន​យក​ឈ្នះ​គូ​ប្រកួត​ប្រជែង​នៅ​អង់គ្លេស​គឺ Leeds និង Fulham ដែល​ពួក​គេ​ចង់​បាន​ខ្សែ​ប្រយុទ្ធ​សញ្ជាតិ​ជប៉ុន​រូប​នេះ​ដែរ។

របាយការណ៍​ពី​គេហទំព័រ 90min.com បាន​អះអាង​ថា ការ​ផ្ទេរ ​Takumi Minamino ពី​ក្លឹប​ហង្សក្រហម Liverpool អាច​នឹង​មាន​ទំហំ​ទឹក​ប្រាក់​ប្រហែល​ជា 15 លាន​អឺរ៉ូ និង​បូក​​បន្ថែម 3 លាន​អឺរ៉ូ​ទៀត​លើ​លក្ខខណ្ឌ​ផ្សេងៗ​ដែល Liverpool ទាមទារ។

ថ្លែង​ទៅ​កាន់ AFP បន្ទាប់​ពី​ការ​ប្រកួត​មិត្តភាព​កាល​ពី​ថ្ងៃសៅរ៍​​ម្សិល​មិញ​នេះ លោក Clement បាន​បញ្ជាក់ថា Minamino ជិត​ក្លាយ​ជា​កូន​ក្រុម​របស់​លោក​ហើយ។ លោក​បាន​និយាយ​ថា៖ “ខ្ញុំ​សប្បាយ​ចិត្ត​ណាស់ ខ្ញុំ​បាន​ស្គាល់​គាត់​ជា​យូរ​មក​ហើយ​។ គាត់​ស្ថិត​ក្នុង​ការ​ចង់​បាន​របស់​​យើង។ អ្នក​រាល់​គ្នា​នៅ​ទី​នេះ​ជឿជាក់​ថា​គាត់​មាន​គុណ​សម្បត្តិ ដើម្បី​នាំ​យក​អ្វី​មួយ​មក​​ឲ្យ​ក្រុម”។

ប្រភព: 90Min