Xavi លើក​ឡើង​ថា យើង​ត្រូវ​បង្ហាញ​ឲ្យ​គេ​ដឹង​ថា ទោះ​ធ្លាក់​ចេញ​ពី UCL ក៏​យើង​ជា​ក្រុម​ដ៏​ល្អ​មួយ

ក្លឹប​អ្នក​មាន​បុណ្យ Barcelona នឹង​ត្រូវ​ជួប​គ្នា​ជា​ថ្មី​ម្ដង​ទៀត​ជា​មួយ​នឹង​គូ​ប្រជែង​ដ៏​ជូរចត់​របស់​ខ្លួន​នារាត្រី​នេះ ដែល​ជា​ការ​ប្រកួត​នៅ​ក្នុង​ក្របខណ្ឌ UEFA Champions League។ បច្ចុប្បន្ន Barcelona កំពុង​មាន​ភាគរយ​ខ្ពស់​បំផុត​ដែល​អាច​នឹង​ត្រូវ​ធ្លាក់​ទៅ​លេង​នៅ UEFA Europa League ព្រោះ​ពួក​គេ​មាន​ត្រឹម​តែ 4 ពិន្ទុ​ប៉ុណ្ណោះ​នៅ​ក្នុង​ពូល C។

យ៉ាង​ណា​មុន​ការ​ប្រកួត​មក​ដល់​លោក Xavi Hernandez ដែល​ជា​គ្រូ​បង្វឹក​បាន​និយាយ​ប្រាប់​ទៅ​កាន់​អ្នក​សារព័ត៌មាន​ថា៖ “យើង​ត្រូវតែ​បង្ហាញ​ឲ្យ​ដឹង​ថា ទោះ​បី​ជា​យើង​ធ្លាក់​ចេញ​ពី UEFA Champions League ក៏​យើង​នៅ​តែ​ជាក្រុម​ដ៏​ល្អ​មួយ ហើយ​យើង​អាច​ប្រកួត​ប្រជែង​ជាមួយ​នឹង​ក្រុម​ល្អ​ៗ​ផ្សេង​ទៀត”។

កាល​ពី​ប្រកួត​ក្រៅ​ដី​នៅ​កីឡាដ្ឋាន Allianz Arena ក្លឹប Barcelona ត្រូវ​បាន Bayern Munich យក​ឈ្នះ​ក្នុង​លទ្ធផល 2 ទល់នឹង 0 ក្នុង​ការ​ប្រកួត​​កាល​ពី​ខែ​មុន ដែល​​លទ្ធផល​នោះ​ដែរ​លោក Xavi Hernandez បាន​ចាត់ទុក​ថា វា​ជា​សំណាង​មិន​ល្អ​របស់​ក្រុម​ខ្លួន ហើយ​ក្រុម​របស់​លោក​ពិត​ជា​ធ្វើ​បាន​ល្អ​ហើយ។ ក្នុង​ចំណោម​បួន​ប្រកួត​នៅ​ក្នុង​ពូល C នៃ​ក្របខណ្ឌ UEFA Champions League រដូវកាល​នេះ Barcelona ឈ្នះបាន​តែ​មួយ​ប្រកួត​ប៉ុណ្ណោះ។

ប្រភព: Businesslive