Manchester United ចាប់​ផ្ដើម​ដាក់​ដេញ​ថ្លៃ 52.5 លានផោន ដើម្បី​ផ្ទេរ Griezmann

យោងតាម​របាយការណ៍​ចុងក្រោយ​មួយ​បាន​ឲ្យ​ដឹង​ថា ក្លឹប​បិសាចក្រហម Manchester United បាន​ចាប់​ផ្ដើម​ដាក់​ដេញ​ថ្លៃ 60 លានអឺរ៉ូ ដែល​ស្មើ​នឹង 52.5 លានផោន ទៅ​លើ​ខ្សែប្រយុទ្ធ Antoine Griezmann របស់​ក្លឹប Atletico Madrid។

ជា​ការ​ពិត​ណាស់​ក្លឹប​បិសាច​ក្រហម​ត្រូវ​បាន​គេ​មើល​ឃើញ​ថា នឹង​ព្យាយាម​ចុះហត្ថលេខា​លើ​ខ្សែប្រយុទ្ធ​ចំណូល​ថ្មី​ម្នាក់​ទៀត​ក្នុង​អំឡុង​ទីផ្សារ​ដោះដូរ​កីឡាករ​ខែ​មករា​ខាង​មុខ​នេះ បន្ទាប់​ពី​ពួក​គេ​បាន​បញ្ចប់​កុងត្រា​របស់ Cristiano Ronaldo កាល​ពី​ចុង​ខែ​វិច្ឆិកា​កន្លង​ទៅ។

ជាមួយ​គ្នា​នេះ​ដែរ Antoine Griezmann ត្រូវ​បាន​ផ្សារ​ភ្ជាប់​ជា​យូរ​មក​ហើយ​ជាមួយ​នឹង​ការ​ផ្ទេរ​ទៅ​កាន់ Old Trafford ដោយ​ក្លឹប​ម្ចាស់​ជើង​ឯក​របស់​អង់គ្លេស 20 សម័យ​មួយ​នេះ បាន​ពិចារ​ណា​ចុះ​ហត្ថលេខា​លើ​គាត់ តាំង​ពី​ពេល​ដែល​កីឡាករ​សញ្ជាតិ​បារាំង​រូប​នេះ​លេង​នៅ Real Sociedad មក​ម្ល៉េះ។

ទោះ​បី​មាន​ទម្រង់​លេង​មិន​សូវ​ល្អ​ជាមួយ Atletico Madrid ក៏​ដោយ ប៉ុន្តែ​កីឡាករវ័យ 31 ឆ្នាំរូប​នេះ​មាន​ទម្រង់​លេង​ដ៏​ល្អ​ជាមួយ​ក្រុម​ជម្រើស​ជាតិ ក្នុង​ព្រឹត្តិការណ៍ FIFA World Cup ឆ្នាំ 2022 ដោយ​បាន​រួម​ចំណែក​ក្នុង​ការ Assist ចំនួន 3 ដង​ក្នុង​ការ​បង្ហាញ​ខ្លួន 7 ប្រកួត ខណៈ​ដែល​ក្រុម​មាន់គក​បារាំង​បាន​ឈាន​ដល់​វគ្គ​ផ្តាច់ព្រ័ត្រ និង​ចាញ់​អាហ្សង់ទីន​តាម​យៈ​បាល់​ប៉េណាល់ទី​កាត់​សេចក្ដី។

យោង​តាម​របាយការណ៍​ពី Fichajes បាន​ឲ្យ​ដឹង​ថា ក្លឹប​បិសាច​ក្រហម Manchester United បាន​ចាត់​ទុក Griezmann ជា​ជម្រើស​ដ៏​ល្អ​សម្រាប់​ជំនួស​កន្លែង​របស់ Cristiano Ronaldo ហើយ​ពេល​នេះ​ពួក​គេ​បាន​ដាក់​សំណើរ​ជា​ទឹកប្រាក់​ចំនួន 60 លានអឺរ៉ូ ដើម្បី​ចរចា​ក្នុង​ការ​ចុះហត្ថ​លេខា​​នៅ​ក្នុង​ខែ​មករា​ដើម​ឆ្នាំ​ក្រោយ។

ប្រភព: Sportsmole