បង្ហាញ​ខ្លួន​លើក​ដំបូង​សម្រាប់ Al-Nassr មិន​សូវ​ល្អ Cristiano Ronaldo ទទួល​បាន​ការ​រិះ​គន់​ខ្លាំង​ពី​អ្នក​គាំទ្រ

ថ្ងៃ​នេះ​នៅ​​លើ​បង្ហាញ​សង្គម Twitter មាន​មនុស្ស​ជា​ច្រើន​​បាន​វាយ​ប្រហារ​យ៉ាង​ខ្លាំង​ទៅ​លើ​តារា​ឆ្នើម Cristiano Ronaldo ចំពោះ​ការ​បង្ហាញ​ខ្លួន​មិន​ល្អ​របស់​គាត់ ជា​ប្រកួត​​លើក​ដំបូង​សម្រាប់​ក្លឹប​ថ្មី Al-Nassr ដែល​ជា​ការ​ប្រកួត​សន្សំ​ពិន្ទុ​ទល់​នឹង​ក្លឹប Ettifaq។

ដោយ​ឡែក​គិត​ចាប់​តាំង​ពី​ការ​ផ្ទេរ​ទៅ​មជ្ឈិមបូព៌ា Cristiano Ronaldo បាន​បង្ហាញ​ខ្លួន​ជា​លើក​ដំបូង​ប៉ុណ្ណោះ​សម្រាប់​ក្លឹប Al-Nassr ដែល​ជា​ការ​ប្រកួត​ក្នុង​លីគ Saudi Pro League។ ក្លឹប Al-Nassr ដែល​ដឹកនាំ​ដោយ​គ្រូ​បង្វឹក​លោក Rudi Garcia បាន​យក​ឈ្នះ 1-0 ទៅ​លើ Ettifaq។ មួយ​គ្រាប់​របស់ Al-Nassr គឺ​ស៊ុត​បញ្ចូល​ទី​ដោយ​អតីត​តារា​ឆ្នើម​របស់​ក្លឹប Benfica គឺ​កីឡាករ Anderson Talisca។

ទន្ទឹម​នឹង​នេះ​ដែរ Cristiano Ronaldo មិន​អាច​រក​គ្រាប់​បាល់​បាន​ឡើយ ហើយ​ទម្រង់​លេង​របស់​គាត់​ហាក់​ដូច​ជា​មិន​សម​ប្រកប​ផង​ដែរ។ ទោះ​បី​ជា​លេង​បាន​ពេញ​មួយ​ការ​ប្រកួត​ក៏​ដោយ Cristiano Ronaldo បាន​ស៊ុត​ចំគោលដៅ​តែ​ម្ដង​ប៉ុណ្ណោះ។ ក្រោយ​ចប់​ការ​ប្រកួត Sofascore បាន​វាយ​តម្លៃ​ពិន្ទុ​នៃ​ការ​បង្ហាញ​សមត្ថភាព​របស់​បុរស​វ័យ 37 ឆ្នាំ​រូប​នេះ​ត្រឹមតែ 6.9។

ក្រោយ​មើល​ឃើញ​ពី​ទម្រង់​លេង​មិន​សូវ​ល្អ​របស់ Cristiano Ronaldo អ្នកគាំទ្រ​មួយចំនួន​បាន​រិះគន់​ថា សូម្បី​តែ​ក្នុង​លីគ​កសិកម្ម​របស់​អារ៉ាប៊ីសាអូឌីត គាត់​​នៅ​តែ​មិន​អាច​លេង​បាន​ល្អ។ អ្នកខ្លះ​ទៀត​បាន​និយាយ​ថា Cristiano Ronaldo មិន​អាច​រក​គ្រាប់​បាល់​​បាន ក្នុង​លីគ​តូចតាច​បំផុតមួយ ដូច្នេះ​ការ​ចូល​និវត្តន៍​ពី​បាល់ទាត់ គួរ​តែ​ជា​ជម្រើស​ដ៏​ល្អ​បំផុត​សម្រាប់​គាត់។

ប្រភព: Sportskeeda