គ្រូ​បង្វឹក​ល្អ​បំផុត​ទាំង 5 រូប នា​ពេល​បច្ចុប្បន្ន (2023)

ការងារ​ជា​គ្រូ​បង្វឹក​មិន​មែន​ជា​រឿង​ងាយ​ស្រួល​ឡើយ ហើយ​វា​កាន់​តែ​ពិបាក​ខ្លាំង​ថែម​ទៀត ក្នុង​ការ​ធ្វើ​ឲ្យ​ខ្លួន​ឯង​ក្លាយ​ជា​គ្រូ​បង្វឹក​ដ៏​ល្អ​មួយ​រូប​ដែល​លេច​ធ្លោរ និង​ទទួល​បាន​ការ​កោតសរសើរ​ពី​អ្នកគាំទ្រ។ មិន​មាន​គ្រូ​បង្វឹក​ច្រើន​ឡើយ ដែល​មជ្ឈដ្ឋាន​បាល់ទាត់​ចាត់​ទុក​ថា ជា​គ្រូ​បង្វឹក​ដ៏​ល្អ​បំផុត។ ដោយ​ឡែក​ថ្ងៃ​នេះ ក្រុម​ការងារ​របស់​យើង សូម​បង្ហាញ​ជូន​នូវ​គ្រូ​បង្វឹក​ដែល​មាន​ការ​ដឹកនាំ​លេច​ធ្លោរ​បំផុត សម្រាប់​ឆ្នាំ 2023 នេះ។

5. Xavi — ដឹកនាំ​នៅ​ក្លឹប Barcelona

គ្រូ​បង្វឹក​រូប​នេះ បាន​បរាជ័យ​ដោយ​ធ្លាក់​ត្រឹម​វគ្គ​ចែក​ពូល​នៃ​ក្របខ័ណ្ឌ UEFA Champions League 2 រដូវកាល​ជាប់ៗ​គ្នា ប៉ុន្តែ​គាត់​បាន​ជួយ​ឲ្យ Barcelona កាន់​កាប់​កំពូល​តារាង​នៃ​ក្របខណ្ឌ La Liga ក្នុង​រដូវកាល​នេះ។ ក្លឹប​យក្ស​កាតាឡាន់ FC Barcelona បាន​ចាញ់​តែ​ម្តង​គត់​ក្នុង​ការ​ប្រកួត​ក្របខណ្ឌ​កំពូល​របស់​អេស្ប៉ាញ ដោយ​បរាជ័យ​នោះ​គឺ​កើត​ឡើង​ពេល​ប៉ះ Real Madrid កាល​ពី​ខែ​តុលា​ឆ្នាំ​មុន។

4. Pep Guardiola — ដឹកនាំ​នៅ​ក្លឹប Manchester City

គ្រូ​បង្វឹក​រូប​នេះ​ធ្លាប់​ឈ្នះ​ពាន Premier League 4 ដង​ជា​មួយ​ក្លឹប Manchester City ហើយ​ទម្រង់​លេង​របស់​ក្រុម​នៅ​តែ​មាន​ភាព​លេចធ្លោរ​រហូត​ដល់​បច្ចុប្បន្ន។ រដូវ​កាល​នេះ ក្រុម​របស់​គាត់​មិន​ស្ថិត​នៅ​កំពូល​តារាង​របស់ Premier League ឡើយ ប៉ុន្តែ​ពួក​គេ​នៅ​តែ​កាន់​កាប់​តំណែង​លេខ 2 និង​នៅ​តែ​មាន​ឱកាស​ក្នុង​ការ​ឈ្នះពាន​លីគ។

3. Eddie Howe — ដឹកនាំ​​នៅ​ក្លឹប Newcastle United

Newcastle United បាន​បោះ​ជំហាន​យ៉ាង​ធំ​ធេង​នៅ​រដូវកាល​ថ្មី​នេះ ដោយ​ពួក​គេ​បាន​ចុះ​ហត្ថ​លេខា​លើ​កីឡាករ​សំខាន់ៗ​មួយ​ចំនួន។ ទោះ​បី​ជា​យ៉ាង​ណា​ក៏ដោយ វា​គឺ​ជា​ចំណែក​មួយ​ដ៏​សំខាន់​របស់​គ្រូ​បង្វឹក Eddie Howe ខណៈ​បច្ចុប្បន្ន Newcastle United កំពុង​ឈរ​នៅ​ចំណាត់​ថ្នាក់​លេខ 3 ក្នុង​តារាង Premier League ហើយ​ក៏​កំពុង​សម្លឹង​មើល​ឱកាស​ក្នុង​ការ​មាន​កៅអី​មក​លេង​នៅ UEFA Champions League រដូវកាល​ក្រោយ​ផង​ដែរ។

2. Mikel Arteta — ដឹកនាំ​នៅ​ក្លឹប​កាំភ្លើងធំ Arsenal

គ្រប់​គ្នា​កំពុង​តែ​មាន​ការ​ងឿងឆ្ងល់​ជា​ខ្លាំង​ថា តើ​គ្រូ​បង្វឹក​រូប​នេះអាច​ប្រែក្លាយ​ស្ថាន​ភាព​យ៉ាង​ដុនដាប​របស់ Arsenal កាល​ពី​រដូវកាល​មុន ទៅ​ជា​ក្រុម​ដែល​កំពុង​កាន់​កាប់​តំណែង​លេខ 1 នៅ Premier League រដូវកាល​នេះ​ដោយ​របៀប​ណា។ លោក Mikel Arteta កំពុង​ត្រូវ​បាន​អ្នក​គាំទ្រ​ពេញ​ចិត្ត​ជា​ខ្លាំង​ជា​មួយ​នឹង​ទម្រង់​នៃ​ការ​​ដឹកនាំ​ដ៏​ល្អ​របស់​គាត់។ Arsenal កំពុង​មាន​ភាគរយ​ខ្ពស់​ក្នុង​ការ​ឈ្នះពាន Premier League នៅ​រដូវកាល​នេះ បន្ទាប់​ពី​ខកខាន​ឈ្នះ​តាំង​ពី​ឆ្នាំ 2003 មក​ម្ល៉េះ។

1. Luciano Spalletti — ដឹកនាំ​នៅ​ក្លឹប Napoli

ក្លឹប Napoli កំពុង​ធ្វើ​ឲ្យ​គ្រប់គ្នា​ចាប់​អារម្មណ៍​ខ្លាំង ក្នុង​រដូវកាល​នេះ ហើយ​ចំណែក​ដ៏​ធំ​មួយ​គឺ​ដោយ​សារ​គ្រូ​បង្វឹក​លោក Luciano Spalletti។ ទោះ​បី​ជា​មិនមាន​សក្កានុពល​លើ​ផ្នែក​ហិរញ្ញ​វត្ថុ​ខ្លាំង​ក៏​ដោយ ប៉ុន្តែ​ពួក​គេ​បាន​ឈរ​នៅ​កំពូល​តារាង​នៃ Serie A និង​មាន​ភាគរយ​ខ្ពស់​បំផុត​ក្នុង​ការ​ឈ្នះពាន​លីគ​នៅ​រដូវកាល​នេះ ព្រោះ​បច្ចុប្បន្ន​ពួក​គេ​មាន​ពិន្ទុ​ដាច់​ពី​ក្រុម​លេខ 2 រហូត​ដល់ 12 ពិន្ទុ​ឯណោះ។ លើស​ពី​នេះ​ទៅ​ទៀត Napoli ថែម​ទាំង​នៅ​មាន​ភារកិច្ច​ប្រកួត​ប្រជែង​ក្នុង​ក្របខណ្ឌ UEFA Champions League ក្នុង​វគ្គ 16 ក្រុម​ចុងក្រោយ​ទៀត​ផង។

ប្រភព: Sportskeeda