ក្លឹប​បិសាចក្រហម ត្រៀម​ដោះដូរ Victor Lindelof ជាមួយ Dumfries

ក្លឹប​បិសាចក្រហម Manchester United ត្រូវ​បាន​គេ​រាយការណ៍​ថា បាន​កំណត់​យក​ខ្សែការពារ​ស្លាប Denzel Dumfries របស់ Inter Milan ជា​គោលដៅ​ផ្ទេរ​ដំបូង​គេ សម្រាប់​ទីផ្សារ​ដោះដូរ​កីឡាករ​រដូវក្តៅ​ខាង​មុខ ហើយ​ពួក​គេ​អាច​នឹង​ប្រើប្រាស់ Victor Lindelof ក្នុង​កិច្ច​ព្រមព្រៀង​ផ្ទេរ​មួយ​នេះ​ផង​ដែរ។

យ៉ាង​ណា​មិញ Victor Lindelof ស្ទើរតែ​គ្មាន​ឱកាស​បង្ហាញ​ខ្លួន​ក្នុង​ជម្រើស​ដំបូង​សម្រាប់​បិសាចក្រហម​ទាំង​ស្រុង​ទៅ​ហើយ នៅ​​រដូវកាល​នេះ ដោយ​គាត់​បង្ហាញ​ខ្លួន​ត្រឹមតែ 5 ប្រកួត ក្នុង​ក្របខ័ណ្ឌ Premier League ខណៈ​ដែលគាត់​មាន​ឱកាស​ខ្លះៗ​បន្ថែម​ទៀត​នៅ Europa League។

នៅ​ចុង​បញ្ចប់​នៃ​រដូវកាល​នេះ ក្រៅ​ពី​ការ​ពង្រឹង​បន្ថែម​នៅ​តំបន់​ប្រយុទ្ធ​របស់​ខ្លួន​លោក Erik ten Hag ក៏​កំពុង​មាន​គម្រោង​នាំ​យក​ខ្សែការពារ​ចំណូល​ថ្មី​បន្ថែម​ទៀត​ផង​ដែរ ដោយ​កីឡាករ​ដែល​គាត់​ចង់​បាន​បំផុត គឺ​ខ្សែការពារ​សញ្ជាតិ​ហូឡង់ Denzel Dumfries។ ដូចគ្នា​នេះ​ដែរ ថ្មីៗ​នេះ​យោងតាម Football Insider បាន​អះអាង​ថា ក្លឹប Manchester United និង Inter Milan អាច​នឹង​ឈាន​ដល់​ព្រមព្រៀង​គ្នា ដើម្បី​ដោះដូរ Dumfries ជា​មួយ Lindelof ហើយ​ក្លឹប​បិសាចក្រហម​អាច​នឹង​បន្ថែម​ប្រាក់​មួយ​ចំនួន​លើ​ការ​ផ្ទេរ​នេះ។

ប្រភព: Sportsmole