Real Madrid កំពុង​ពិចារណា​ជម្រើស​មួយ​រវាង Kylian Mbappe និង Jude Bellingham

ក្លឹប​អធិរាជស Real Madrid ត្រូវ​បាន​គេ​រាយការណ៍​ថា នឹង​ចំណាយ​លុយ​ធំ ដើម្បី​ចុះ​ហត្ថលេខា​ផ្ទេរ​កីឡាករ​ឆ្នើម​មួយ​រូប​នៅ​រដូវក្ដៅ​ខាង​មុខ​នេះ។ ក្នុង​នាម​ជា​ម្ចាស់​ជើង​ឯក La Liga និង​ជា​ម្ចាស់​ពាន UCL កាល​ពី​រដូវកាល​មុន នៅ​រដូវកាល​នេះ Real Madrid ហាក់​ដូច​ជា​មិន​សូវ​ទទួល​បាន​ភាព​ជោគជ័យ​ឡើយ ខណៈ​ដែល​ពាន La Liga អាច​នឹង​ត្រូវ​បាត់​បង់​ទៅ​លើ Barcelona ហើយ​ពាន UEFA Champions League ក៏​មិន​មាន​ភាព​ប្រាកដ​ប្រជា​ផង​ដែរ។

ប្រសិន​បើ​ពួក​គេ​មិន​បាន​ឈ្នះពាន La Liga និង UEFA Champions League ទេ​នោះ រដូវកាល​ឆ្នាំ 2022-2023 នេះ ពួក​គេ​មិន​មាន​សមិទ្ធិផល​អ្វី​ធំដុំ​ឡើយ ហើយ​​លោក Carlo Ancelotti ត្រូវ​បាន​គេ​រំពឹង​ទុក​ថា នឹង​ព្យាយាម​ស្វែង​រក​កីឡាករ​ចំណូល​ថ្មី ដើម្បី​កែ​លម្អរ​ក្រុម​ឲ្យ​កាន់​តែ​ប្រសើរ​ឡើង។

កន្លង​មក Real Madrid ត្រូវ​បាន​គេ​អះអាង​ថា នឹង​ព្យាយាម​ចុះហត្ថលេខា​លើ​ខ្សែ​បម្រើ Jude Bellingham របស់ Borussia Dortmund នៅ​ចុង​បញ្ចប់​នៃ​រដូវកាល​នេះ។ ទន្ទឹម​នឹង​នេះ​ដែរ មាន​ការ​លើក​ឡើង​ថា Real Madrid នៅ​តែ​បន្ត​តាមដាន​ការ​វិវត្តន៍ពី​ស្ថានភាព​របស់ Kylian Mbappe របស់ Paris Saint-Germain បើ​ទោះ​បី​ជា​ខ្សែប្រយុទ្ធ​រូប​នេះ​បាន​ច្រានចោល​ការ​ផ្ទេរ​កាល​ពី​ឆ្នាំ 2022 ក៏ដោយ។

Jude Bellingham ត្រូវ​បាន​គេ​ដឹងថា មាន​តម្លៃ​ផ្ទេរ​ប្រមាណ​ជា 150 លានផោន ខណៈ​ដែល Mbappe ទំនង​ជា​មាន​តម្លៃ​ប្រហាក់​ប្រហែល​គ្នា អាស្រ័យ​លើ PSG។ យោងតាម Marca បាន​ឲ្យ​ដឹង​ថា មន្ត្រី​របស់​ក្លឹប Real Madrid មិន​ចង់​ចាយ​លុយ​ច្រើន​ទៀត​ទេ​នៅ​ចុង​ឆ្នាំ​នេះ។ កន្លង​មក​ពួក​គេ​បាន​ចំណាយ​លើ Eduardo Camavigna និង Aurelien Tchouameni ហើយ​ពេល​នេះ​ប្រហែល​ជា​អាច​ចំណាយ​លើ​កីឡាករ​ម្នាក់​ទៀត​ប៉ុណ្ណោះ​ក្នុង​ចំណោម Kylian Mbappe រឺ Jude Bellingham។

ប្រភព: Sportsmole