Napoli ត្រៀម​ដាក់​លក់ Kim Min-Jae នៅ​ចុង​បញ្ចប់​នៃ​រដូវកាល​នេះ

ក្លឹប​យក្ស​របស់​អ៊ីតាលី Napoli ត្រូវ​បាន​គេ​រាយការណ៍​ថា បាន​បើក​ចំហ​ចំពោះ​ការ​ដាក់​លក់​ខ្សែ​ការពារ Kim Min-jae នៅ​ក្នុង​អំឡុងពេល​នៃ​ទីផ្សារ​ដោះដូរ​កីឡាករ​នា​រដូវក្តៅ​ខាង​មុខ។ ខ្សែការពារ​សញ្ជាតិ​កូរ៉េ​ខាង​ត្បូង​រូប​នេះ ត្រូវ​បាន​គេ​ដឹង​ថា បាន​ប្រឡូក​ចូល​ក្នុង​បាល់ទាត់​របស់​លីគ​កំពូល​នៅ​តំបន់​អឺរ៉ុប ត្រឹមតែ 1 ឆ្នាំ​ប៉ុណ្ណោះ បន្ទាប់​ពី​ចាកចេញ​ពី​ក្លឹប​យក្សទួរគី Fenerbahce ក្នុង​ឆ្នាំ 2022។

ទោះ​បី​ជា​យ៉ាង​ណា​ក៏ដោយ បន្ទាប់​ពី​ត្រូវ​បាន​ចុះ​ហត្ថលេខា​ដោយ Napoli ដើម្បី​មក​ជំនួស​ខ្សែការពារ Kalidou Koulibaly ដែល​បាន​ចាក​ចេញ​ទៅ​ក្លឹប​តោខៀវ Chelsea កីឡាករ​វ័យ 26 ឆ្នាំ ដែល​មក​ពី​តំបន់​អាស៊ី​រូប​នេះ ទទួល​បាន​ភាព​ជោគជ័យ​ជា​ខ្លាំង និង​ក្លាយ​ជា​កីឡាករ​ម្នាក់ ក្នុង​ចំណោម​កីឡាករ​ដែល​ក្លឹប​ធំៗ​ជា​ច្រើន​ចង់​បាន​បំផុត។

ខ្សែការពារ​កណ្ដាល​រូបនេះ គឺ​ជា​តារា​ឆ្នើម​ម្នាក់​នៅ​លីគ​កំពូល​របស់​អ៊ីតាលី ដោយ​បាន​បង្ហាញ​ខ្លួន​ចំនួន 34 ប្រកួត ក្នុង​ក្របខ័ណ្ឌ Serie A និង UEFA Champions League។ គាត់​បាន​ជួយ Napoli ឲ្យ​ឈរ​លើ​កំពូល​តារាង និង​ត្រៀម​លើកពាន Serie A នា​រដូវ​កាល​នេះ​ថែម​ទៀត​ផង។

ខណៈ​ពេល​ដែល​មជ្ឃដ្ឋាន​បាល់​ទាត់​មួយ​ចំនួន​មើល​ឃើញ​ថា Napoli ចង់​រក្សា Kim Min-jae ឲ្យ​បាន​យូរ​តាម​ដែល​អាច​ធ្វើ​ទៅ​បាន​នោះ របាយការណ៍​ពី Get Football News Italy បាន​និយាយ​ថា ប្រធាន​ក្លឹប​លោក Aurelio De Laurentiis អាច​នឹង​ត្រូវ​បាន​ល្បួង​ឲ្យ​លក់​កីឡាករ​ឆ្នើម​រូប​នេះ​ចេញ​នៅ​ចុង​បញ្ចប់​នៃ​រដូវកាល។ នៅ​រដូវក្ដៅ​ខាង​មុខ​នេះ Napoli ត្រូវ​បាន​គេ​មើល​ឃើញ​ថា នឹង​ជួប​ប្រទះ​នូវ​ផលវិបាក​ក្នុង​ការ​ស្វែង​រក​ខ្សែការពារ​កណ្ដាល​ថ្មី​ម្នាក់ ដូច​ពេល​ដែល​គេ​លក់ Kalidou Kouliably កាល​ពី​ឆ្នាំ​មុន​ដែរ។

ប្រភព: Sportsmole