ក្លឹប​យក្ស 3 នៅ Premier League កំពុង​ចាប់​អារម្មណ៍​លើ​ខ្សែការពារ Andreas Christensen

របាយការណ៍​ចុង​ក្រោយ​មួយ​បាន​ឲ្យ​ដឹង​ថា ក្លឹប​អង់គ្លេស ចំនួន​បី កំពុង​ចាប់​អារម្មណ៍​លើ​ខ្សែការពារ Andreas Christensen របស់ Barcelona។ យោងតាម​គេហទំព័រ Fichajes បាន​លើក​ឡើង​ថា ក្លឹប​អ្នក​មាន​បុណ្យ Barcelona ក៏​ចង់​លក់ Christensen នៅ​រដូវក្តៅ​នេះ​ដែរ ដើម្បី​ឲ្យ​ស្រប​តាម​ច្បាប់ Financial Fair Play (FFP) របស់ UEFA។

ខ្សែការពារ​ឆ្នើម​រូប​នេះ បាន​ចូលរួម​ជាមួយ Barcelona កាល​ពី​រដូវ​ក្តៅ​ឆ្នាំ​មុន ក្នុង​នាម​ជា​កីឡាករ​ដែល​គ្មាន​តម្លៃ​ខ្លួន​ពី​តោខៀវ Chelsea ហើយ​បាន​លេង​ញឹកញាប់​បំផុត​នៅ​ក្រោម​ការ​ដឹកនាំ​របស់​គ្រូ​បង្វឹក​លោក Xavi Hernandez លើក​លែង​តែ​ពេល​របួស​ប៉ុណ្ណោះ។ Andreas Christensen មាន​កុងត្រា​ជាមួយ​ក្លឹប​បច្ចុប្បន្ន​របស់​ខ្លួន​រហូត​ដល់​ខែ​មិថុនា ឆ្នាំ 2026។

យ៉ាង​ណា​មិញ​កីឡាករ​សញ្ជាតិ​ដាណឺម៉ាក​រូបនេះ​មាន​ទម្រង់​លេង​លេចធ្លោរ​គួរ​ឲ្យ​ចាប់​អារម្មណ៍​បំផុត ក្នុង​រដូវកាល​នេះ និង​ជា​ពិសេស​នៅ​ពេល​ដែល​គាត់​ចាប់​ដៃ​គូ​គ្នា​លេង​នៅ​តំបន់​ការពារ​កណ្ដាល​ជាមួយ Ronald Araujo។ ស្រប​ពេល​ដែល​មាន​ទម្រង់​លេង​ដ៏​ល្អ​នៅ Camp Nou នេះ​ដែរ បាន​ធ្វើ​ឲ្យ Andreas Christensen ត្រូវ​បាន​ក្លឹប​ធំៗ​បី​ដែល​មាន Newcastle United, Tottenham Hotspur និង Aston Villa ចង់​ចរចា​ផ្ទេរ​នាំ​យក​គាត់​ត្រឡប់​ទៅ​ទឹកដី​អង់គ្លេស​វិញ។

ក្នុង​ចំណោម​ក្លឹប​ទាំង​នេះ Newcastle United ត្រូវ​បាន​គេ​គិត​ថា នឹង​មាន​ភាគ​រយ​ខ្ពស់​ក្នុង​ការ​ទទួល​បាន Christensen ខណៈ​ដែល​បច្ចុប្បន្ន​ពួក​គេ​កំពុង​ឈរ​នៅ​ចំណាត់​ថ្នាក់​លេខ 3 ក្នុង​តារាង Premier League ក្រោម​ការ​ដឹកនាំ​ដ៏​អស្ចារ្យ​ពី​គ្រូ​បង្វឹក​លោក Eddie Howe ក្នុង​រដូវកាល​នេះ ហើយ​ពួក​គេ​មាន​មហិច្ឆតា​ចង់​ប្រជែង​យក​ពាន Premier League នៅ​រដូវកាល​ក្រោយ។ ពួកគេ​ប្រើប្រាស់​ខ្សែការពារ​កណ្តាល Fabian Schar និង Sven Botman ជា​ជម្រើស​ដំបូង ហើយ​ចង់​នាំយក Christensen ដើម្បី​ឲ្យ​ទម្រង់​លេង​កាន់​តែ​ប្រសើរ​មួយ​កម្រិត​ថែម​ទៀត។

ប្រភព: Sportskeeda