Marseille កំពុង​ទាក់​ទង​ចរចា​ផ្ទេរ Wilfried Zaha របស់ Crystal Palace

តារា​ឆ្នើម​របស់​ក្លឹប Crystal Palace គឺ​កីឡាករ Wilfried Zaha ត្រូវ​បាន​គេ​រាយការណ៍​ថា កំពុង​ទទួល​បាន​ការ​ល្បួង​ពី​ក្លឹប Marseille ដែល​ស្ថិត​នៅ​លីគ​កំពូល​នៃ​ប្រទេស​បារាំង Ligue 1។ ដោយ​ឡែក​ខ្សែ​ប្រយុទ្ធ​ស្លាប​រូប​នេះ​នឹង​ចប់​កុងត្រា​របស់​ខ្លួនជាមួយ​ក្លឹប​បច្ចុប្បន្ន​នៅ​ចុង​បញ្ចប់​នៃ​រដូវកាល​នេះ ដែល​មាន​ន័យ​ថា គាត់​នឹង​អាច​ចាក​ចេញ​ពី​ទឹកដី​អង់គ្លេស ក្នុង​នាម​ជា​កីឡាករ​គ្មាន​តម្លៃ​ខ្លួន។

យ៉ាង​ណា​មិញ Wilfried Zaha គឺ​ជា​កីឡាករ​ដែល​ប្រសូត្រ​ចេញ​ពី​ថ្នាល​យុវជន​របស់​ក្លឹប Crystal Palace នេះ​ផ្ទាល់​តែ​ម្ដង ហើយ​គាត់​បាន​ចូល​លេង​ជាមួយ​ឈុត​ធំ​ជា​លើក​ដំបូង​នៅ​ឆ្នាំ 2013 ហើយ​ចាប់​ទាំង​ពី​ពេល​នោះ​មក ខ្សែ​ប្រយុទ្ធ​សញ្ជាតិ​កូតឌីវ័រ​រូប​នេះ​បាន​បង្ហាញ​ខ្លួន​សរុប 456 ប្រកួត​សម្រាប់​ក្លឹប ដោយ​រក​បាន​គ្រាប់​បាល់​ស៊ុត​បញ្ចូលទី 90 គ្រាប់ និង 76 Assist។

ថ្វី​ត្បិតតែ Wilfried Zaha ជា​ផ្នែក​មួយ​ដ៏​សំខាន់​​របស់​ក្លឹប​ក៏ដោយ ប៉ុន្តែ​បច្ចុប្បន្ន​កីឡាករ​ឆ្នើម​រូប​នេះ​កំពុង​ពិចារណា​ចាកចេញ​នៅ​ចុង​បញ្ចប់​នៃ​រដូវកាល​នេះ​ហើយ ដោយ​កន្លង​មក​គេ​បាន​ដឹង​ថា គាត់​ចង់​ស្វែង​រក​ការ​ប្រកួត​ប្រជែង​នៅ​ក្លឹប​ថ្មី ដែល​អាច​មាន​ឱកាស​ឈ្នះពាន​ធំៗ​បាន។

ជាក់​ស្ដែង​ថ្មីៗ​នេះ យោងតាម​របាយការណ៍​ពី​គេហទំព័រ 90min បាន​ឲ្យ​ដឹង​ថា អ្នក​តំណាង​របស់ Zaha បាន​ជួប​ពិភាក្សា​ជាមួយ​ក្លឹប Marseille ដើម្បី​ស្វែងរក​លទ្ធភាព​នាំ​យក​គាត់​ទៅ​ទឹកដី​បារាំង​នៅ​ចុង​បញ្ចប់​នៃ​រដូវកាល​នេះ។ ផ្អែក​តាម​ទម្រង់​លេង​របស់ Marseille ដែល​កំពុង​ឈរ​នៅ​ចំណាត់​ថ្នាក់​លេខ 2 នៅ Ligue 1 ពួក​គេ​នឹង​មាន​ភាគរយ​ខ្ពស់ក្នុង​ការ​មាន​កៅអី​លេង​ពាន UCL រដូវកាល​ក្រោយ ដែល​នេះ​ហើយ​ជា​ផ្នែក​មួយ​ដែល​អាច​ទាក់​ចិត្ត Wilfried Zaha បាន។

ប្រភព: Sportsmole