Sergio Aguero ថា Enzo Fernandez នឹង​លេង​បាន​ល្អ​ខ្លាំង ក្រោម​ការ​ដឹកនាំ​របស់​គ្រូ​បង្វឹក​ថ្មី Pochettino

អតីត​វីរបុរស​របស់​ក្លឹប​មេឃខៀវ Manchester City លោក Sergio Aguero បាន​ព្យាករណ៍​ទុក​ជា​មុន​ថា ខ្សែបម្រើ Enzo Fernandez នឹង​មាន​ទម្រង់​លេង​ដ៏​ល្អ​ប្រសើរ​ខ្លាំង​ជាង​មុន ក្រោម​ការ​ដឹកនាំ​របស់​គ្រូបង្វឹក​ថ្មី​របស់​តោខៀវ Chelsea លោក Mauricio Pochettino នៅ​រដូវកាល​ក្រោយ។

យ៉ាង​ណា​មិញ​តោខៀវ Chelsea បាន​ប្រកាស​ពី​ការ​មក​ដល់​របស់​គ្រូ​បង្វឹក​សញ្ជាតិ​អាហ្សង់ទីន Pochettino ជា​គ្រូ​បង្វឹក​ថ្មី កាល​ពី​ប៉ុន្មាន​សប្តាហ៍​មុន។ អតីត​គ្រូ​បង្វឹក​របស់ PSG រូប​នេះ បាន​ចូល​មក​ដឹកនាំ​បន្ត​ពី​គ្រូ​បណ្ដោះ​អាសន្ន​លោក Frank Lampard ហើយ​នឹង​ដឹកនាំ​ការ​ប្រកួត​ចាប់​ពី​រដូវកាល​ក្រោយ​នេះ​តទៅ។

ទោះ​ជា​យ៉ាង​ណា​ក៏​ដោយ​ពាក់ព័ន្ធ​នឹង​រឿង​នេះ​ដែរ Aguero ជឿជាក់​ថា Fernandez ដែល​ជា​កីឡាករ​មួយ​រូប​ដែល​តោខៀវ​បាន​ចុះ​ហត្ថលេខា​ក្នុង​តម្លៃ 107 លានផោន​នោះ អាច​រៀន​សូត្រ និង​រីកចម្រើន​ខ្លាំង ក្រោម​ការ​ដឹកនាំ​របស់ Pochettino។ Aguero បាន​ប្រាប់​ទៅ​កាន់ Stake ថា៖ “ការ​មក​ដឹកនាំ​របស់​គាត់​សំខាន់​ណាស់។ គាត់​ធ្លាប់​បាន​ដឹកនាំ​នៅ Tottenham Hotspur ហើយ​គាត់​បាន​បង្ហាញ​ពី​គុណសម្បត្តិ​របស់​គាត់ ដោយ​ផ្ដល់​​គុណភាព​លេង​ដល់​​កីឡាករ​​ក្មេងៗ… ហើយ Fernandez នឹង​ក្លាយ​ជា​​ម្នាក់​ក្នុង​ចំណោម​ពួក​គេ”។

ប្រភព: Dailypost NG