បិសាច​ក្រហម​ចង់​នាំ​យក Andre Onana មក​ជំនួស David de Gea

ក្លឹប​បិសាចក្រហម Manchester United ត្រូវ​បាន​គេ​រាយការណ៍​ថា បាន​ពិភាក្សា​ជាមួយ​ភ្នាក់ងារ​របស់​អ្នកចាំទី Andre Onana អំពី​ការ​ផ្ទេរ​ដែល​អាច​កើត​ឡើង​នា​រដូវក្ដៅ​នេះ​រួច​ហើយ។ ទន្ទឹម​នឹង​នេះ​ដែរ បិសាចក្រហម​ចង់​ជ្រើសរើស​បេក្ខភាព​អ្នក​ចាំទី​ដៃទី​មួយ​ថ្មី បន្ទាប់​ពី​ការ​ចរចា​​ត្រូវ​ជាប់គាំង​ជាមួយ​នឹង​ David de Gea ដែល​នឹង​ត្រូវ​ផុត​កុងត្រា​នៅ​ចុង​ខែ​នេះ។

ដំបូង​ឡើយ Manchester United មាន​ទំនុក​ចិត្ត​លើ​កិច្ច​ព្រមព្រៀង​ថ្មី​មួយ​ជាមួយនឹង De Gea ប៉ុន្តែ​អ្នកចាំទី​សញ្ជាតិ​អេស្ប៉ាញ​រូប​នេះ មិន​ព្រម​ទទួល​យក​ការ​បន្ត​កុងត្រា ដែល​ត្រូវ​​កាត់​ប្រាក់​ខែ​របស់​គាត់​នោះ​ទេ។ ជាមួយ​នឹង​រឿង​រ៉ាវ​មិន​ល្អ និង​ការ​ផុត​កំណត់​កុងត្រា​ក្នុង​រយៈពេល​មួយ​សប្តាហ៍​ទៀត​របស់ David de Gea ក្លឹប​បិសាចក្រហម​បាន​កំណត់​គោលដៅ​លើ Andre Onana ជា​អ្នក​ជំនួស​តំណែង​ដ៏​សាកសម​លើ​អ្នកចាំទី​វ័យ 32 ឆ្នាំ​រូប​នេះ។

យោងតាម​សារព័ត៌មាន Daily Mail បាន​ឲ្យ​ដឹង​ថា បិសាច​ក្រហម​បាន​បង្កើន​ការ​ខិតខំ​ប្រឹងប្រែង​របស់​ពួកគេ ជាមួយ​នឹង​ការ​ចរចារ​លើ​កិច្ច​ព្រមព្រៀង​ជាមួយ​ភ្នាក់ងារ​របស់ Andre Onana គឺ​លោក Albert Botines។ លើស​ពី​នេះ​ទៀត Manchester United ក៏​បាន​ធ្វើ​ការ​ពិភាក្សា​ជា​លើក​ដំបូង​ជាមួយ Inter Milan រួច​ហើយ​ដែរ ដោយ​ពួកគេ​សង្ឃឹម​ថា ការ​ផ្ទេរ​អាច​ត្រូវ​បាន​យល់​ព្រម​ក្នុង​តម្លៃ​ប្រហែល 45 លានផោន។

ប្រភព: Sportsmole