បាល់ទាត់អន្តរជាតិ
អតីតកីឡាករមួយរូបរបស់ Man United ថា ខ្លួនពិតជាមិនយល់ឡើយ ហេតុអ្វីក្លឹបនាំយក Onana មកជំនួសអ្នកចាំទីដែលឈ្នះស្រោមដៃមាសកាលពីរដូវកាលមុន
អតីតខ្សែប្រយុទ្ធមួយរូបរបស់ក្លឹបបិសាចក្រហម Manchester United គឺលោក Dwight Yorke បានចោទសួរការសម្រេចចិត្តរបស់ក្លឹប ក្នុងការដោះលែង David de Gea ឲ្យចាកចេញដោយគ្មានតម្លៃខ្លួននៅរដូវក្តៅនេះ ហើយនាំយក Andre Onana ជាអ្នកចាំទីដៃទីមួយជំនួសកីឡាករសញ្ជាតិអេស្ប៉ាញរូបនេះទៅវិញ។
យ៉ាងណាមិញ De Gea គឺជាអ្នកចាំទីដែលបានឈ្នះស្រោមដៃមាសនៅ Premier League កាលពីរដូវកាលមុន ប៉ុន្តែកុងត្រារបស់គាត់នៅ Old Trafford បានផុតកំណត់ ហើយក្លឹបសម្រេចចិត្តមិនបន្តកុងត្រាថ្មីជាមួយកីឡាករសញ្ជាតិអេស្ប៉ាញរូបនេះឡើយ និងឲ្យគេចាកចេញដោយគ្មានតម្លៃខ្លួន។
ស្របពេលជាមួយគ្នានោះ Onana ត្រូវបានបិសាចក្រហមចំណាយប្រាក់ 51 លានអឺរ៉ូ ដើម្បីផ្ទេរគេមកពី Inter Milan។ ទោះជាយ៉ាងណាក៏ដោយ Andre Onana មានស្ថិតិមិនសូវល្អឡើយ ក្នុងការបង្ហាញខ្លួនជាមួយបិសាចក្រហម ហើយកាលពីពេលថ្មីៗនេះ ក្នុងការប្រកួតទល់នឹង Bayern Munich គាត់បានប្រហែសឲ្យ Leroy Sane ស៊ុតចូលពីចម្ងាយ ចំដៃរបស់ ហើយត្រូវបានអ្នកគាំទ្រជាច្រើនបន្ទោសទៀតផង។
គិតមកទល់នឹងពេលនេះ Onana បានធ្វើឲ្យធ្លាយគ្រាប់បាល់រហូតដល់ 14 គ្រាប់ ក្នុងការបង្ហាញខ្លួនផ្លូវការណ៍ 6 ប្រកួតដំបូងរបស់បិសាចក្រហម។ ពាក់ព័ន្ធនឹងរឿងនេះដែរ ថ្មីៗនេះអតីតវីរបុរសរបស់ក្លឹប Dwight Yorke បាននិយាយទៅកាន់ OLBG ថា៖ “ខ្ញុំបាននិយាយពីមុនហើយថា Man United ត្រូវតែប្រុងប្រយ័ត្ននូវអ្វីដែលពួកគេចង់បាន ជាមួយនឹងការបាត់បង់ David de Gea។ រាល់រឿងល្អៗដែល De Gea បានធ្វើសម្រាប់ Man United ហើយបញ្ចប់ដោយបែបនេះ គឺពិតជាអាក្រក់ណាស់។… De Gea បានឈ្នះស្រោមដៃមាស គឺដូចជាការឈ្នះស្បែកជើងមាស និងជាអ្នកស៊ុតបញ្ចូលទីច្រើនជាងគេនៅក្លឹប ប៉ុន្តែនៅតែត្រូវបានក្លឹបរកអ្នកជំនួស។ រឿងនោះមិនសូវជាល្អសម្រាប់ខ្ញុំទេ”។
ប្រភព: Sportsmole