បាល់ទាត់អន្តរជាតិ
Inter Milan បើកចិត្តទទួលយក Andre Onana ឲ្យត្រឡប់ទៅវិញ នាពេលវេលាណាមួយនៃអនាគត
នាយកប្រតិបត្តិរបស់ក្លឹប Inter Milan លោក Giuseppe Marotta បានលើកឡើងថា នឹងអនុញ្ញាតឲ្យ Andre Onana ត្រឡប់ទៅ San Siro ក្នុងដំណាក់កាលណាមួយនាពេលអនាគត។ យ៉ាងណាមិញ Giuseppe Marotta បានលើកឡើងបែបនេះ ស្របពេលដែលអតីតអ្នកចាំទីរបស់ខ្លួន Andre Onana កំពុងមានទម្រង់លេងមិនល្អនៅក្លឹបបិសាចក្រហម Manchester United។
គួររំលឹកផងដែរថា កីឡាករសញ្ជាតិកាមេរូនរូបនេះបានផ្លាស់ទៅ Inter Milan ក្នុងនាមជាកីឡាករដែលគ្មានតម្លៃខ្លួនបន្ទាប់ពីផុតកុងត្រាជាមួយក្លឹបហូឡង់ AFC Ajax នៅរដូវក្តៅឆ្នាំ 2022។ ទម្រង់លេងរបស់ Andre Onana ទទួលបានការចាប់អារម្មណ៍យ៉ាងខ្លាំង នៅប្រទេសអ៊ីតាលីក្នុងអំឡុងរដូវកាលឆ្នាំ 2022-2023 ដោយបង្ហាញខ្លួនបាន 41 ប្រកួត និងរក្សាបាល់មិនឲ្យចូលសំណាញ់ទីបាន 19 ដង។
ទោះជាយ៉ាងណាក៏ដោយ កីឡាករវ័យ 27 ឆ្នាំរូបនេះបានផ្លាស់ទៅ Old Trafford កាលពីដើមរដូវកាលនេះ ជាមួយនឹងតម្លៃខ្លួន 47 លានផោន។ Onana បានចុះហត្ថលេខាលើកុងត្រារយៈពេល 5 ឆ្នាំជាមួយក្រុមរបស់លោក Erik ten Hag ហើយគិតមកទល់នឹងពេលនេះគាត់បានបង្ហាញខ្លួន 11 ប្រកួតមកហើយ។
ខុសគ្នាស្រឡះកាលពីនៅ Inter Milan អ្នកចាំទីរូបនេះ បានបង្ហាញសមត្ថភាពមិនល្អឡើយ ហើយក៏ធ្វើឲ្យអ្នកគាំទ្រជាច្រើនរិះគន់ផងដែរ។ រហូតដល់ពេលនេះ ប្រសិនបើទម្រង់លេងមិនល្អនៅតែបន្ត បិសាចក្រហមកំពុងពិចារណាប្រើប្រាស់ Altay Bayindir ជាអ្នកចាំទីដៃទីពីរ ជំនួស Andre Onana វិញ។
ពាក់ព័ន្ធនឹងរឿងនេះដែរ នាយកប្រតិបត្តិរបស់ក្លឹប Inter Milan លោក Giuseppe Marotta ត្រូវបានគេសួរអំពីលទ្ធភាពនៃការវិលត្រឡប់របស់ Andre Onana មក San Siro វិញ។ Marotta មិនបានបដិសេធពីការវិលត្រឡប់របស់អតីតអ្នកចាំទីរូបនេះទៅ Inter Milan វិញឡើយ និងថែមទាំងបានអះអាងថា អ្វីៗសុទ្ធតែអាចកើតឡើងនៅក្នុងពិភពបាល់ទាត់។
ប្រភព: Sportsmole