Ilkay Gundogan ថា Barcelona ជា​ក្លឹប​ក្នុង​ក្ដី​ស្រមៃ​របស់​ខ្លួន តាំង​ពី​កុមារភាព​មក

ខ្សែ​បម្រើ Ilkay Gundogan របស់ Manchester City បាន​បញ្ចប់​ការ​ផ្ទេរ​របស់​គាត់​ជា​ផ្លូវការណ៍​ទៅ​កាន់ Barcelona កាល​ពី​ម្សិលមិញ​នេះ។ ខ្សែ​បម្រើ​សញ្ជាតិ​អាឡឺម៉ង់​រូប​នេះ បាន​ចាកចេញ​ពី Man City នៅ​ពេល​ផុត​កំណត់​កុងត្រា ហើយ​ទោះ​បី​ជា​លោក Pep Guardiola ក៏​មិន​អាច​បញ្ចុះ​បញ្ចូល​គាត់​ឲ្យ​បន្ត​កុងត្រា​ជាមួយ​ក្លឹប​យក្ស​អង់គ្លេស​បាន​ដែរ ខណៈ​ដែល​របាយការណ៍​ជា​ច្រើន​បាន​អះអាង​ថា Gundogan បាន​សម្រេច​ចិត្ត​រួច​ជា​ស្រេច ក្នុង​ការ​ចូលរួម​ជាមួយ Barcelona។

Ilkay Gundogan បាន​ចុះ​ហត្ថលេខា​លើ​កុងត្រា​រយៈពេល 2 ឆ្នាំ​នៅ Camp Nou ជាមួយ​នឹង​ជម្រើស​មួយ​ឆ្នាំ​បន្ថែម​ទៀត។ ក្រោយ​ការ​ប្រកាស​ជា​សាធារណៈ​អំពី​រឿង​នេះ Gundogan បាន​និយាយ​ទាក់ទង​នឹង​ការ​ផ្ទេរ​របស់​ខ្លួន​ដោយ​អះអាង​ថា គាត់​មក​លេង​ក្នុង​ទឹកដី​អេស្ប៉ាញ​ជាមួយ​នឹង​ទឹកចិត្ត​នៃ​ការ​ស្រឡាញ់ Barcelona និង​ជា​ក្ដី​ស្រមៃ​របស់​ខ្លួន​ទាំង​ពី​តូច​មក​ម្ល៉េះ។

ខ្សែបម្រើ​ឆ្នើម​រូប​នេះ​បាន​និយាយ​ថា៖ “ប្រសិន​បើ​ខ្ញុំ​នឹង​ចាកចេញ មាន​ក្លឹប​តែ​មួយ​គត់​ក្នុង​លោក​ដែល​សម​ហេតុផល​បំផុត វា​ជា Barcelona។ តាំង​ពី​តូច​មក ខ្ញុំ​សុបិន​ចង់​ក្លាយ​ជា​កីឡាករ​ដែល​លេង​ឲ្យ​ក្លឹប​មួយ​នេះ។… ខ្ញុំ​ដឹង​ថា នឹង​មាន​សម្ពាធ​ច្រើន​នៅ Barcelona។ ប៉ុន្តែ​ខ្ញុំ​ចូល​ចិត្ត​សម្ពាធ។ ខ្ញុំ​ចូលចិត្ត​ចាកចេញ​ពី​តំបន់​សុខ​ស្រួល​របស់​ខ្ញុំ។ ខ្ញុំ​មិន​ចង់​ស្វែង​រក​កន្លែង​ដែល​​ងាយ​ស្រួល​នោះ​ទេ។ ខ្ញុំ​កំពុង​ស្វែង​រក​ការ​ប្រកួត​ប្រជែង​ថ្មី។ ខ្ញុំ​ពិតជា​រង់​ចាំ​យ៉ាង​អន្ទះសារ ក្នុង​បង្ហាញ​ខ្លួន​ជាមួយ​នឹង​សម្លៀក​បំពាក់​ជា​កីឡាករ​របស់ Barcelona”។

ប្រភព: Plaantik