Newcastle ត្រៀម​ចាយ​លុយ 80 លានអឺរ៉ូ កាត់​មុខ Man United និង Real Madrid

ក្លឹប Newcastle United បាន​ឈូក​ដៃ​ចូល​រួម​ក្នុង​ការ​ប្រជែង​ដើម្បី​ចុះ​ហត្ថលេខា​លើ ខ្សែ​ប្រយុទ្ធ​ម្នាក់​ក្នុង​ចំណោម​ខ្សែ​ប្រយុទ្ធ​ដែល​គេ​ចង់​បាន​បំផុត​នៅ​តំបន់​អឺរ៉ុប​នា​ពេល​បច្ចុប្បន្ន។ ក្លឹប​អ្នក​មាន​នៅ​អង់គ្លេស​មួយ​នេះ​គ្រោង​នឹង​ចាប់ផ្តើម​ការ​ដេញ​ថ្លៃ​ដ៏​ខ្ពស់​មួយ​ចំនួន 80 លានអឺរ៉ូ សម្រាប់​តម្លៃ​ខ្លួន Goncalo Ramos។

ការ​ហ៊ាន​ដេញ​ថ្លៃ​ជា​លើក​ដំបូង​ក្នុង​ចំនួន​ទឹកប្រាក់​ដ៏​ធំ​បែប​នេះ​របស់ Newcastle United ហាក់​ដូច​ជា​បាន​កាត់​មុខ​ក្លឹប​ធំៗ​ជា​ច្រើន ដែល​រួម​មាន​ទាំង​បិសាចក្រហម Manchester United និង Real Madrid ផង​ដែរ ដោយ​ពួក​គេ​ក៏​ចាប់​អារម្មណ៍​ខ្លាំង​ទៅ​លើ​ខ្សែ​ប្រយុទ្ធ​សញ្ជាតិ​ព័រទុយហ្គាល់​រូប​នេះ​ដូចគ្នា។

ខ្សែ​ប្រយុទ្ធ Goncalo Ramos បាន​ទទួល​ភាព​ទាក់ទាញ​ខ្លាំង បន្ទាប់​ពី​រូប​គេ​បាន​ស៊ុត​បញ្ចូល​ទី​បាន​ 3 ​គ្រាប់​ឲ្យ​ព័រទុយហ្គាល់​ក្នុង​ការ​ប្រកួត​វគ្គ 16 ក្រុម​ចុង​ក្រោយ​នៃ​ការ​ប្រកួត FIFA World Cup ឆ្នាំ 2022 នៅ​ប្រទេស​កាតា។ ខ្សែ​ប្រយុទ្ធ​វ័យ​ក្មេង​រូប​នេះ​បន្ត​ភាព​លេច​ធ្លោរ​នៅ​ក្លឹប​របស់​ខ្លួន​ដោយ​ស៊ុត​បញ្ចូល​ទី​បាន 27 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន 12 ដង ក្នុង​ការ​ប្រកួត​ចំនួន 47 ប្រកួត​សម្រាប់ Benfica កាលពី​រដូវកាល​មុន។

ក្លឹប​បិសាចក្រហម​របស់​លោក Erik ten Hag ត្រូវ​បាន​ផ្សារភ្ជាប់​ជា​យូរ​មក​ហើយ​ជាមួយ​នឹង​ការ​ផ្ទេរ Goncalo Ramos ខណៈ​ដែល Real Madrid ក៏​បាន​ដាក់​រ៉ាដា​លើ​គាត់​ដែរ សម្រាប់​ជា​អ្នក​ជំនួស​រយៈពេល​វែង​របស់ Karim Benzema។ ស្រប​ពេល​ដែល​ក្លឹប​ទាំង​ពីរ​នេះ​មិន​ទាន់​បាន​ដាក់​សំណើរ​ជា​ផ្លូវការណ៍​នោះ Newcastle ត្រូវ​បាន​គេ​រាយ​ការណ៍​ថា ត្រៀម​ទឹកប្រាក់​នៃ​ការ​ដេញ​ថ្លៃ​បំបែក​កំណត់​ត្រា​នៃ​ក្លឹប​របស់​ខ្លួន​ចំនួន 80 លានអឺរ៉ូ សម្រាប់ Goncalo Ramos បើ​ទោះ​បី​ជា​បច្ចុប្បន្ន​ពួក​គេ​មាន Alexander Isak ក៏​ដោយ។

ប្រភព: Dailypost NG