Romelu Lukaku ចាកចេញ ដោយ​បន្សល់​ទុក​រឿង​ល្អក់​កករ​នៅ Inter Milan

ក្លឹប Inter Milan ត្រូវ​បាន​គេ​ដឹង​ថា កំពុង​មិន​សប្បាយ​ចិត្ត​នឹង Romelu Lukaku ព្រោះ​ខ្សែប្រយុទ្ធ​ដែល​ខ្ចី​ជើង​ពី​ក្លឹប​តោខៀវ Chelsea រូប​នេះ បាន​ពិភាក្សា​ជាមួយ​ក្លឹប​ជា​គូ​ប្រជែង​​នៅ Serie A របស់​ពួកគេ​គឺ Juventus។ យោងតាម Sky Sport អ៊ីតាលី​បាន​ឲ្យ​ដឹង​ថា Lukaku មិន​ឆ្លើយ​តប​នឹង​ប្រធាន​ក្លឹប Inter Milan និង​មិត្ត​រួម​ក្រុម​ចាស់​របស់​ខ្លួន​ទេ ដោយ​គាត់​កំពុង​ត្រៀម​ខ្លួន​រួច​ជា​ស្រេច​ក្នុង​ការ​ចូលរួម​ជាមួយ Juventus។

យ៉ាង​ណា​មិញ Romelu Lukaku បាន​ចំណាយ​ពេលនៅ​រដូវកាល​មុន ក្នុង​លក្ខខ័ណ្ឌ​ខ្ចី​ជើង​នៅ Inter Milan។ ក្រោយ​ចប់​ការ​ខ្ចី​ជើង ក្លឹប Inter Milan និង Chelsea កំពុង​ពិភាក្សា​លើ​អនាគត​របស់​គាត់។ ទោះ​ជា​យ៉ាងណា​ក៏ដោយ​អំឡុង​ពេល​នោះ ​មេធាវី​របស់​ខ្សែ​ប្រយុទ្ធ​រូប​នេះ មិន​បាន​ទាក់ទង​ជាមួយ Inter Milan និង Chelsea ទេ ដោយ​ជំនួស​មក​វិញ​ជា​ការ​ចរចា​បញ្ចប់​កិច្ចព្រមព្រៀង​តម្លៃ​ប្រហែល 37 លានអឺរ៉ូ​ទៅ Juventus ទៅ​វិញ។

គេជឿ​ថា Lukaku ត្រូវ​បាន​ល្បួង​ដោយ​សំណើរ​នៃ​លក្ខខណ្ឌ​ល្អ​មួយ​ពី Juventus ខណៈ​ដែល Inter Milan បាន​ដាក់​សំណើរ​ជា​ទឹកប្រាក់ 35 លានអឺរ៉ូ បូក​នឹង​ប្រាក់​បន្ថែម 5 លាន​អឺរ៉ូ​បន្ថែម​​ទៀត តែ​ការ​ដេញ​ថ្លៃ​របស់ Juventus មាន​តម្លៃ 37.5 លានអឺរ៉ូ បូក​នឹង​ប្រាក់ 2.5 លាន​អឺរ៉ូ​បន្ថែម។ ទោះ​បី​ជា​យ៉ាង​ណា​ក៏ដោយ Juventus នៅ​តែ​មិន​ទាន់​ត្រៀម​ខ្លួន​រួចរាល់​ក្នុង​ការ​ផ្តល់​​ជូន​សំណើរ​ជា​ផ្លូវការ​លើ Lukaku នោះ​ទេ ដោយ​ពួកគេ​ត្រូវការ​លក់ Dusan Vlahovic ជា​មុន​សិន។

ប្រភព: Dailypost NG