Messi នឹង​បង្ហាញ​ខ្លួន​ក្នុង​ការ​ប្រកួត​ដំបូង Leagues Cup សម្រាប់ Inter Miami នៅ​ព្រឹក​ស្អែក​នេះ

កាល​ពី​មួយ​ម៉ោង​មុន​នេះ​ក្លឹប Inter Miami បាន​ផុស​ផ្ទាំង​ផ្សព្វផ្សាយ​ពី​ការ​ប្រកួត Leagues Cup រវាង​ក្លឹប​របស់​ខ្លួន​ជាមួយ​នឹង Cruz Azul ដែល​នៅ​ក្នុង​ផ្ទាំង​ផ្សព្វផ្សាយ​នោះ​ក៏​មាន​ដាក់​រូប​របស់ Lionel Messi ផង​ដែរ។ វា​ជា​សញ្ញា​មួយ​បង្ហាញ​ថា ខ្សែ​ប្រយុទ្ធ​ឆ្នើម​សញ្ជាតិ​អាហ្សង់​ទីន​នឹង​បង្ហាញ​ខ្លួន​ក្នុង​ការ​ប្រកួត​នោះ ដែល​វា​ជា​ប្រកួត​បើក​ឆាក​នៃ​អាជីពបាល់ទាត់​ជាមួយ​ក្លឹប​ថ្មី​របស់​គាត់។

ទន្ទឹម​នឹង​នេះ​ដែរ ម្សិលមិញ​នេះ​គ្រូ​បង្វឹក​របស់​ក្លឹប Inter Miami លោក Tata Martino បាន​និយាយ​ថា Lionel Messi និង Sergio Busquets ប្រហែល​ជា​មិន​ក្លាយ​ជា​ជម្រើស​ដំបូង​របស់​ក្រុម សម្រាប់​ការ​ប្រកួត Leagues Cup ជា​មួយ Cruz Azul នៅ​ព្រឹកស្អែក​នេះ​ទេ ប៉ុន្តែ​ពួកគេ​នឹង​បង្ហាញ​ខ្លួន​ជា​កីឡាករ​បម្រុង​ដែល​ប្ដូរ​ចូល​ជំនួស​មិត្ត​រួម​ក្រុម​របស់​ខ្លួន។

យ៉ាង​ណា​មិញ Messi និង Busquets ត្រូវ​បាន​គេ​ឃើញ​ថា បាន​ចូល​ហ្វឹកហាត់​ជាមួយ Inter Miami កាល​ពី​ថ្ងៃ​អង្គារ​សប្ដាហ៍​នេះ។ សំបុត្រ​នៃ​ការ​ប្រកួត​រវាង Inter Miami និង Cruz Azul ត្រូវ​បាន​លក់​រហូត​ដល់​អស់​ពី​ស្តុក​សម្រាប់​អ្នក​គាំទ្រ ជាមួយ​នឹង​តម្លៃ​ចន្លោះ​ពី 275$ ទៅ 19,000$។ សម្រាប់​ទី​កន្លែង​ប្រកួត​នឹង​ធ្វើ​ឡើង​នៅ​កីឡដ្ឋាន DRV PNK វេលា​ម៉ោង 8:00PM ថ្ងៃ​នេះ ដែល​ត្រូវ​នឹង​ម៉ោង 7:00AM ព្រឹក​ស្អែក (ម៉ោង​នៅ​កម្ពុជា)។

ប្រភព: Dailypost NG