ក្លឹប​យក្ស 2 នៅ​អង់គ្លេស កំពុង​ត្រៀម​ប្រជែង​គ្នា​ដើម្បី​ចុះ​ហត្ថលេខា​លើ​ខ្សែ​ប្រយុទ្ធ​ជប៉ុន​មួយ​រូប​ដែល​កំពុង​ឡើង​ជើង​ខ្លាំង

ក្លឹប​ហង្សក្រហម Liverpool ត្រូវ​បាន​គេរាយការណ៍​ថា នឹង​ប្រឈម​មុខ​ប្រកួត​ប្រជែងជាមួយ Tottenham Hotspur ដែល​ជា​ក្លឹប​នៅ Premier League ដូច​គ្នា ដោយ​ត្រៀម​ធ្វើ​ការ​ចរចា​ដើម្បី​ចុះ​ហត្ថលេខា​លើ​ខ្សែប្រយុទ្ធ​កណ្តាល​របស់​ក្លឹប Brondby គឺ​កីឡាករ Yuito Suzuki។

កីឡាករ​វ័យ​ក្មេង​របស់​ជប៉ុន​រូប​នេះ ត្រូវ​បាន​គេ​មើល​ឃើញ​ថា មាន​ទេពកោសល្យ​ដ៏​លេច​ធ្លោរ​បំផុត និង​ជា​ពិសេស​គេ​កំពុង​ក្លាយ​ជា​កីឡាករ​ម្នាក់ រះចែងចាំង​ក្នុង​​ក្របខ័ណ្ឌ​កំពូល​របស់ដាណឺម៉ាក។ បន្ថែម​លើស​ពី​នេះ​ទៀត Yuito Suzuki កំពុង​ទទួល​បាន​ការ​ទាក់ទាញ​ចំណាប់​អារម្មណ៍​ពី​ក្លឹប​កំពូលៗ​ជា​ច្រើន​នៅ​តំបន់​អឺរ៉ុប​ផង​ដែរ​ដូច​ជា Liverpool, Tottenham Hotspur, Man City និង Manchester United។

ខ្សែ​ប្រយុទ្ធ​វ័យ 22 ឆ្នាំ​រូបនេះ​ស៊ុត​បាល់​បញ្ចូល​ទី​បាន 10 គ្រាប់ និង​បញ្ជូន​បាល់​ឲ្យ​មិត្ត​រួម​ក្រុម​បាន​ចំនួន 7 ដង​ក្នុង​ការ​បង្ហាញ​ខ្លួន 25 ប្រកួត​សម្រាប់ Brondby។ ដោយ​ឡែក​យោងតាម​របាយការណ៍​ដែល​បាន​ចុះ​ផ្សាយ​ដោយ Sportsmole បាន​ឲ្យ​ដឹង​ថា ក្នុង​ចំណោម​ក្លឹប​ជា​ច្រើន​ដែល​ចាប់​អារម្មណ៍​លើ Yuito Suzuki មាន​ក្លឹប 2 គឺ Liverpool និង Tottenham Hotspur ដែល​កំពុង​មាន​ចេតនា​ច្បាស់​លាស់​ដើម្បី​ត្រៀម​ចរចា​ផ្ទេរ​គេ​នៅ​រដូវក្ដៅ​ខាង​មុខ​នេះ។

ប្រភព: Sportsmole