Bruno Fernandes ប្រាប់​មូលហេតុ​សំខាន់ ដែល​ធ្វើ​ឲ្យ​គាត់​ត្រូវ​បាន​គ្រូ​បង្វឹក​ជ្រើសរើស​ធ្វើ​ជា​កាពីតែន​ក្រុម​ថ្មី

កាពីតែន​ក្រុម​ថ្មី​របស់​ក្លឹប​បិសាចក្រហម Manchester United គឺ​កីឡាករ Bruno Fernandes បាន​និយាយ​អំពី​មោទនភាព​របស់​គាត់​ដែល​ត្រូវ​បាន​តែងតាំង​ជា​ប្រធាន​ក្រុម​ថ្មី​ជំនួស​តំណែង​របស់ Harry Maguire។ ថ្លែង​បន្ទាប់​ពី​ប្រកួត​ដែល​ទទួល​ជ័យជម្នះ 2-0 លើ Arsenal ក្នុង​ការ​ប្រកួត​មិត្តភាព​មុន​បើក​រដូវកាល​កាល​ពី​ម្សិលមិញ​នេះ ខ្សែបម្រើ​សញ្ជាតិព័រទុយ​ហ្គាល់​បាន​និយាយ​ថា គាត់​រំពឹង​ថា​នេះ​ជា​ការ​ចាប់​ផ្ដើម​ដ៏​ល្អ សម្រាប់​ជោគជ័យ​នា​រដូវកាល​ថ្មី​ដែល​នឹង​ចាប់​ផ្ដើម​ឡើង​ឆាប់ៗ​ខាង​មុខ។

ខ្សែ​បម្រើ Bruno Fernandes គឺ​ជា​ម្ចាស់​គ្រាប់​បាល់​បើក​ឆាក​សម្រាប់​ការ​នាំ​មុខ Arsenal 1-0 នៅ​នាទីទី 30 មុន​ពេល​ដែល Jadon Sancho បាន​ស៊ុត​បញ្ចូលទី​ថែម​មួយ​គ្រាប់​ទៀត​នៅ​នាទីទី 37។ ថ្វីត្បិតតែ​វា​ជា​ការ​ប្រកួត​មិត្តភាព​មិន​ផ្លូវការណ៍​ក៏​ដោយ ទម្រង់​លេង​របស់​បិសាចក្រហម​ពិត​ជា​គួរ​ឲ្យ​ចាប់​អារម្មណ៍​ខ្លាំង និង​ត្រូវ​បាន​គេ​គិត​ថា អាច​ប្រជែង​ពាន​ធំៗ​បាន​នា​រដូវកាល​ថ្មី​នេះ។

ដោយ​ឡែក​នៅ​ក្រោយ​ចប់​ការ​ប្រកួត Bruno Fernandes ត្រូវ​បាន​គេ​សួរ​អំពី​ការ​សម្រេចចិត្ត​របស់​លោក Erik ten Hag អំពី​ការ​តែងតាំង​គាត់​ជា​កាពីតែន​ក្រុម​ថ្មី។ ពេល​នោះ​គាត់​បាន​លើក​ឡើង​ថា៖ “គ្រូ​បង្វឹក​បាន​ជ្រើសរើស​ខ្ញុំ​ដោយ​សារ​តែ​អ្វី​ដែល​ខ្ញុំ​បាន​បង្ហាញ​កាល​ពី​រដូវកាល​មុន និង​របៀប​ដែល​ខ្ញុំ​ធ្វើ​ការ​ជាមួយ​គាត់។ គាត់​ចូលចិត្ត​របៀប​ដែល​ខ្ញុំ​ធ្វើ​ការ វិន័យ​របស់​ខ្ញុំ អ្វី​គ្រប់​យ៉ាង​ដែល​ខ្ញុំ​បង្ហាញ ចំណង់​ចំណូល​ចិត្ត​របស់​ខ្ញុំ… នេះ​មូលហេតុ​ដែល​ខ្ញុំ​មើល​ឃើញ មិន​មានអ្វី​ខុស​ពី​នេះ​ឡើយ”។

ប្រភព: Dailypost NG