គ្រូ​បង្វឹក 5 រូប ដែល​ចាយ​លុយ​ទិញ​កីឡាករ​ច្រើន​បំផុត ក្នុង​ប្រវត្តិសាស្ត្រ​បាល់ទាត់

នៅ​ចុង​បញ្ចប់​នៃ​រដូវកាល​ម្ដងៗ ការ​ទិញ​លក់​កីឡាករ​ពី​ក្លឹប​នានា​ជុំ​វិញ​ពិភព​លោក​តែងតែ​កើត​មាន​ឡើង ដែល​នោះ​ជា​ការ​ព្យាយាម​ពង្រឹង​បន្ថែម​នូវ​ទម្រង់​លេង ក៏​ដូច​ជា​កែ​លម្អរ​បញ្ហា​ខ្វះ​ខាត​នៅ​ក្នុង​ក្រុម​របស់​ពួក​គេ។ យ៉ាង​ណា​មិញ ការ​ទិញ​លក់​កីឡាករ​មិន​មែន​អាស្រ័យ​ទៅ​លើ​ក្លឹប​ទាំង​ស្រុង​នោះ​ទេ គឺ​អាស្រ័យ​ទៅ​លើ​គ្រូ​បង្វឹក​ជា​សំខាន់។

គ្រូ​បង្វឹក គឺ​ជា​មនុស្ស​ដ៏​សំខាន់​ម្នាក់ ដែល​ចង្អុល​បង្ហាញ​ដល់​ប្រធាន​ក្លឹប និង​ថ្នាក់​លើ​របស់​ក្លឹប​ថា តើ​កីឡាករ​រូប​ណា​ដែល​ពួក​គេ​គួរ​លក់​ចេញ និង​គួរ​ទិញ​ចូល។ ​ពាក់​ព័ន្ធ​នឹង​រឿង​នេះ​ដែរ ថ្ងៃ​នេះ​ក្រុម​ការងារ​យើង​នឹង​លើក​យក​គ្រូ​បង្វឹក​កំពូល​ទាំង 5 នៅ​តំបន់​អឺរ៉ុប ដែល​ធ្លាប់​បាន​ឲ្យ​ក្លឹប​ចំណាយ​លុយ​ផ្ទេរ​កីឡាករ​ខ្ពស់​បំផុត​ក្នុង​ប្រវត្តិសាស្ត្រ​បាល់ទាត់ ដោយ​យោងតាម​ឯកសារ​ផ្លូវការណ៍​របស់ Planet Football។

5. លោក Massimiliano Allegri – 1.08 ពាន់លាន​អឺរ៉ូ

Allegri បាន​លូកដៃ​យ៉ាង​សកម្ម​ក្នុង​ទីផ្សារផ្ទេរកីឡាករ ពេល​​នៅ​ដឹកនាំ​ក្លឹប AC Milan ហើយ​បន្ទាប់​មក​គ្រូ​បង្វឹក​រូប​នេះ​បាន​ចាកចេញ​មក Juventus។ នៅ​ក្នុង​ការ​ដឹកនាំ​ដំបូង​របស់​គាត់ ជាមួយ Juventus គាត់​បាន​ចំណាយ​ប្រាក់ 90 លានអឺរ៉ូ​លើ​ការ​ចុះ​ហត្ថលេខា Gonzalo Higuain។ គាត់​ក៏​ជា​អ្នក​នាំ​យក Cristiano Ronaldo មក​ទឹកដី​អ៊ីតាលី​​ផង​ដែរ នៅ​ឆ្នាំ 2018 ជាមួយ​នឹង​តម្លៃ 117 លានអឺរ៉ូ។

4. Manuel Pellegrini – 1.16 ពាន់លាន​អឺរ៉ូ

គ្រូ​បង្វឹក​រូប​ណា​ក៏ដោយ​ដែល​បាន​មក​ដឹកនាំ Real Madrid និង Manchester City ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ នឹង​ត្រូវ​ចំណាយ​ប្រាក់​ច្រើន​លើ​ការ​ផ្ទេរ​កីឡាករ។ ដូចគ្នា​នេះ​ដែរ កាល​នៅ Real Madrid លោក Manuel Pellegrini បាន​ចុះ​ហត្ថលេខា​បំបែក​កំណត់ត្រា​ចំនួនពីរ​លើ​ខ្សែបម្រើ Kaka (67 លានអឺរ៉ូ) និង Cristiano Ronaldo (94 លានអឺរ៉ូ)។ ពេល​ទៅ​ដឹកនាំ​នៅ Man City គាត់​បាន​ផ្ទេរ Kevin De Bruyne ក្នុង​តម្លៃ 76 លានអឺរ៉ូ​ពី Wolfsburg។

3. Carlo Ancelotti – 1.44 ពាន់លាន​អឺរ៉ូ

Ancelotti គឺ​ជា​គ្រូ​បង្វឹក​ដ៏​ល្អ​បំផុត​ក្នុង​ប្រវត្តិសាស្ត្រ ហើយ​បាន​ចំណាយ​ពេល​ជា​ច្រើន​នៅ​ដឹកនាំ​ក្លឹប​មួយ​ចំនួន​ដូច​ជា AC Milan, Real Madrid និង Chelsea។ ក្រៅ​ពី​មាន​ឈ្មោះ​ជា​គ្រូ​បង្វឹក​ឆ្នើម​នោះ Carlo Ancelotti ក៏​ជា​មនុស្ស​ម្នាក់​ដែល​ចាយ​លុយ​ធំ​លើ​ការ​ផ្ទេរ​កីឡាករ​ដែរ។ ការ​​ចុះ​​ហត្ថលេខា​ផ្ទេរ​ដ៏​​ថ្លៃ​បំផុត​របស់​គាត់​គឺ​ការ​នាំ​យក Gareth Bale ពី Tottenham Hotspur មក Real Madrid ក្នុង​តម្លៃ 105 លាន​អឺរ៉ូ កាល​ពី​ឆ្នាំ 2013។

2. Pep Guardiola – 1.61 ពាន់លាន​អឺរ៉ូ

ខណៈ​ដែល​បច្ចុប្បន្ន Pep Guardiola គឺ​ជា​គ្រូ​បង្វឹក​ដ៏អស្ចារ្យ​បំផុត​ម្នាក់នោះ គាត់​ក៏​ជាប់​ឈ្មោះ​ជា​អ្នក​ចាយ​លុយ​ផ្ទេរ​កីឡាករ​ច្រើន​បំផុត​ដែរ។ គាត់​ធ្លាប់​បាន​ដឹកនាំ​ក្លឹប​ធំៗ 3 ដូចជា Barcelona, Bayern Munich និង​បច្ចុប្បន្ន Manchester City។ Pep Guardiola បាន​ឲ្យ​ក្លឹប​ចាយលុយ 69.5 លានអឺរ៉ូ លើ​ការ​ផ្ទេរ Zlatan Ibrahimovic ក្នុង​ឆ្នាំ 2009 ពេល​នៅ​ដឹកនាំ Barcelona។ ការ​ផ្ទេរ​ដ៏​គួរ​ឲ្យ​ចាប់​អារម្មណ៍​មួយ​ទៀត គឺ​គាត់​បាន​នាំយក Jack Grealish ក្នុងឆ្នាំ 2021 ជាមួយ​តម្លៃ​ខ្លួន 100 លានផោន (113 លានអឺរ៉ូ)។

1. Jose Mourinho – 1.71 ពាន់លាន​អឺរ៉ូ

គ្រូ​បង្វឹក​រូប​នេះ​មាន​រហ័ស្សនាម​ថា The Special One។ គាត់​ធ្លាប់​បាន​ដឹកនាំ​ក្លឹប​ជា​ច្រើន​ដូចជា Chelsea, Manchester United និង Real Madrid ហើយ​កំឡុង​ពេល​គាត់​ដឹកនាំ​នៅ Man United គ្រូ​បង្វឹក​រូប​នេះ​បាន​ឲ្យ​ក្លឹប​ចុះហត្ថលេខា​ធំៗ​បំផុត​ចំនួន 3 ដោយ​ផ្ទេរ Paul Pogba, Romelu Lukaku និង Fred ដែល​មាន​តម្លៃ​សរុប​ជាង 220 លានអឺរ៉ូ។ Jose Mourinho ត្រូវ​បាន​ជាប់​ឈ្មោះ​នៅ​លេខ​រៀង​ទីមួយ ជា​អ្នក​ចាយ​លុយ​ផ្ទេរ​កីឡាករ​ច្រើន​ជាង​គ្រូ​បង្វឹក​ណាៗ​ទាំងអស់។

ប្រភព: Sportbible