បាល់ទាត់អន្តរជាតិ
Dusan Vlahovic មិនចាប់អារម្មណ៍ជាមួយនឹងជម្រើសក្នុងការផ្ទេរទៅ Stamford Bridge
ខ្សែប្រយុទ្ធ Dusan Vlahovic របស់ក្លឹបសេះបង្កង់ Juventus ត្រូវបានគេរាយការណ៍ថា មិនពេញចិត្តជាមួយនឹងជម្រើសក្នុងការផ្ទេរមកចូលរួមជាមួយក្លឹប Chelsea នៅរដូវក្ដៅនេះឡើយ។ យ៉ាងណាមិញ Vlahovic បានចំណាយពេលត្រឹមតែជាងមួយឆ្នាំកន្លះប៉ុណ្ណោះ នៅទីក្រុង Turin ដោយស៊ុតបញ្ចូលទីសរុបបាន 23 គ្រាប់ ពីការបង្ហាញខ្លួន 63 ប្រកួត។
ទោះជាយ៉ាងណាក៏ដោយ កីឡាករសញ្ជាតិស៊ែប៊ីរូបនេះបានស៊ូទ្រាំនឹងយុទ្ធនាការនៅរដូវកាលមុន 2022-2023 យ៉ាងលំបាក ខណៈដែល Juventus អាចបញ្ចប់ត្រឹមចំណាត់ថ្នាក់ទី 7 ក្នុងក្របខ័ណ្ឌ Serie A ជាមួយនឹងការដាក់ទណ្ឌកម្មកាត់ពិន្ទុផងដែរ។ ស្របពេលដែលពួកគេមិនមានកៅអីលេង UCL រដូវកាលក្រោយ ហើយត្រូវការសម្រួលបញ្ហាហិរញ្ញវត្ថុផងដែរ អនាគតរបស់ Vlahovic បានក្លាយជាប្រធាននៃការជជែកវែកញែកជាច្រើននៅរដូវក្ដៅនេះ។
គេបានអះអាងថា Juventus និង Chelsea បានពិភាក្សាគ្នាទាក់ទងនឹងកិច្ចព្រមព្រៀងផ្ទេរ និងដោះដូរ Dusan Vlahovic ជាមួយនឹងខ្សែប្រយុទ្ធ Romelu Lukaku។ អ្វីៗហាក់ដូចជាបានដំណើរការទៅមុខយ៉ាងរលូន ប៉ុន្តែថ្មីៗនេះរបាយការណ៍ពី La Gazzetta dello Sport បានអះអាងថា Vlahovic មិនចង់ចាកចេញទៅ Stamford Bridge នោះឡើយ។ កីឡាករវ័យ 23 ឆ្នាំរូបនេះត្រូវបានគេនិយាយថា នឹងពេញចិត្តជម្រើសនៃការផ្ទេរទៅ Paris Saint-Germain ព្រោះតោខៀវ Chelsea ក៏មិនមានកៅអីលេង UCL ដូច Juventus ដែរ។
ប្រភព: Sportsmole