បាល់ទាត់អន្តរជាតិ
Van Dijk ត្រូវបានចោទប្រកាន់ពីបទបំពាន និងប្រមាថដល់មន្ត្រីអាជ្ញាកណ្ដាល ក្រោយពេលទទួលបានកាតក្រហម
កាពីតែនក្រុមរបស់ហង្សក្រហម Liverpool គឺកីឡាករ Virgil van Dijk ត្រូវបានចោទប្រកាន់ពីបទបង្ហាញនូវអាកប្បកិរិយាមិនសមរម្យលើមន្ត្រីអាជ្ញាកណ្ដាល ជុំវិញប្រតិកម្មរបស់គាត់ចំពោះការពិន័យកាតក្រហម ហើយត្រូវបណ្តេញចេញពីការប្រកួតទល់នឹងក្រុម Newcastle United កាលពីចុងសប្តាហ៍មុន។
យ៉ាងណាមិញ Virgil van Dijk បានកាតក្រហមពីលោក John Brooks ដែលជាអាជ្ញាកណ្ដាលនៅក្នុងការប្រកួតរបស់ហង្សក្រហមទល់នឹង Newcastle United សម្រាប់កំហុសដែលគាត់បានបង្កើតឡើងទៅលើ Alexander Isak នៅក្នុងតង់ទី 1 នាទីទី 28។ ថ្វីត្បិតតែមានគ្នាត្រឹមតែ 10 នាក់ ប៉ុន្តែហង្សក្រហម Liverpool របស់គាត់នៅតែអាចទទួលបានជ័យជម្នះ 2-1 ទៅលើក្រុមម្ចាស់ផ្ទះ Newcastle United។
ខ្សែការពារសញ្ជាតិហូឡង់រូបនេះនឹងត្រូវពិន័យមួយប្រកួតបន្ទាប់ ដោយសារកាតក្រហមនៅក្នុងការប្រកួតថ្ងៃមុននោះ។ ទោះជាយ៉ាងណាក៏ដោយ ពេលនេះ FA បានចោទប្រកាន់ ករណីផ្សេងមួយទៀតលើ Van Dijk ដែលជាការប្រព្រឹត្តិទង្វើមិនសមរម្យ ដោយបានប្រើភាសាបំពាន និងប្រមាថចំពោះមន្ត្រីអាជ្ញាកណ្ដាល ក្នុងអំឡុងពេលដើរចូលទៅបន្ទប់ក្រោមដី។ Virgil van Dijk មានសិទ្ធិតវ៉ាលើការចោទប្រកាន់នេះ រហូតដល់ថ្ងៃសុក្រទី 1 ខែកញ្ញាខាងមុខ មុនពេល FA អាចចាត់ការវិធានការផ្សេងៗលើគាត់។
ប្រភព: Sportsmole